ஈரோடு கிழக்கு தொகுதி சட்டமன்ற உறுப்பினராக சந்திரகுமார் பதவியேற்பு

ஈரோடு கிழக்கு தொகுதியில் காங்கிரஸ் கட்சி சார்பாக போட்டியிட்டு வெற்றி பெற்ற திருமகன் ஈவேரா கடந்த  2023-ஆம் ஆண்டு தொடக்கத்தில் உடல்நலக் குறைவு காரணமாக காலமானதைத் தொடர்ந்து இடைத்தேர்தல் நடைபெற்றது. இதில், திருமகன் ஈவேராவின் தந்தையும், மூத்த காங்கிரஸ் தலைவருமான ஈவிகேஎஸ் இளங்கோவன் போட்டியிட்டார். 

இவர் கடந்த டிசம்பர் 14-ம் தேதி உயிரிழந்ததை அடுத்து ஈரோடு கிழக்கு தொகுதி காலியானதாக அறிவிக்கப்பட்டது. தொடர்ந்து, கடந்த 5-ஆம் தேதி ஈரோடு கிழக்கு தொகுதிக்கு இடைத்தேர்தல் நடைபெற்றது. இந்த தேர்தலில் திமுக சார்பில் சந்திரகுமாரும், நாம் தமிழர் கட்சி சார்பில் சீதாலட்சுமி உள்ளிட்ட 46 வேட்பாளர்கள் களம் கண்ட நிலையில் அதிமுக, பாஜக, தேமுதிக உள்பட எதிர்க்கட்சிகள் தேர்தலை புறக்கணித்தது. 

மேலும் படிக்க: ஈரோடு கிழக்கு தொகுதி இடைத்தேர்தல் 2025: தொடர்ந்து முன்னிலை வகிக்கும் திமுக

இதையடுத்து, ஈரோடு கிழக்கு தொகுதி இடைத்தேர்தலுக்கான வாக்கு எண்ணிக்கை கடந்த 8-ஆம் தேதி நடைபெற்றது. இதில், 67.97 சதவிகிதம் வாக்குகள் பதிவானதாக தேர்தல் ஆணையம் அதிகாரப்பூர்வமாக அறிவித்தது. மொத்தம் உள்ள இரண்டு லட்சத்து 27 ஆயிரத்து 546 வாக்காளர்களில் ஒரு லட்சத்து 54 ஆயிரத்து 657 வாக்காளர்கள் தங்களது வாக்குகளை பதிவு செய்தனர்.

இந்த தேர்தலில் திமுக வேட்பாளர் சந்திரகுமார் ஒரு லட்சத்து 17 ஆயிரத்து 158 வாக்குகள் பெற்று வெற்றி பெற்றார். அவரை எதிர்த்து போட்டியிட்ட நாம் தமிழர் கட்சி வேட்பாளர் சீதாலட்சுமியை விட 93 ஆயிரத்து 286 வாக்குகள் வித்தியாசத்தில் வெற்றி பெற்றார். நாம் தமிழர் கட்சி வேட்பாளர் சீதாலட்சுமி 23, 872 வாக்குகள் பெற்று தோல்வியடைந்தார்.

இந்நிலையில், ஈரோடு கிழக்கு தொகுதி இடைத்தேர்தலில் வெற்றி பெற்ற சந்திரகுமார் இன்று (பிப். 10) சட்டமன்ற உறுப்பினராக பதவி ஏற்றார். சட்டப்பேரவை வளாகத்தில் முதலமைச்சர் மு.க.ஸ்டாலின் முன்னிலையில் சபாநாயகர் அப்பாவு சந்திரகுமாருக்கு பதவிப் பிரமாணம் செய்து வைத்தார். 

மேலும் படிக்க: ஈரோடு கிழக்கு தொகுதி இடைத்தேர்தல் வாக்கு எண்ணிக்கை தொடங்கியது