ஈரோடு கிழக்கு தொகுதி இடைத்தேர்தல் 2025: தொடர்ந்து முன்னிலை வகிக்கும் திமுக

ஈரோடு கிழக்கு தொகுதியில் காங்கிரஸ் கட்சி சார்பாக போட்டியிட்டு வெற்றி பெற்ற திருமகன் ஈவேரா கடந்த  2023-ஆம் ஆண்டு தொடக்கத்தில் உடல்நலக் குறைவு காரணமாக காலமானதைத் தொடர்ந்து இடைத்தேர்தல் நடைபெற்றது. இதில், திருமகன் ஈவேராவின் தந்தையும், மூத்த காங்கிரஸ் தலைவருமான ஈவிகேஎஸ் இளங்கோவன் போட்டியிட்டார். 

இவர் கடந்த டிசம்பர் 14-ம் தேதி உயிரிழந்ததை அடுத்து ஈரோடு கிழக்கு தொகுதி காலியானதாக அறிவிக்கப்பட்டது. தொடர்ந்து, கடந்த 5-ஆம் தேதி ஈரோடு கிழக்கு தொகுதிக்கு இடைத்தேர்தல் நடைபெற்றது. இந்த தேர்தலில் திமுக சார்பில் சந்திரகுமாரும், நாம் தமிழர் கட்சி சார்பில் சீதாலட்சுமி உள்ளிட்ட 46 வேட்பாளர்கள் களம் கண்டனர்.

அதிமுக, பாஜக, தேமுதிக உள்பட எதிர்க்கட்சிகள் தேர்தலை புறக்கணித்தது. இந்தத் தொகுதியில், மொத்தம் உள்ள 2 லட்சத்து 27 ஆயிரத்து 546 வாக்காளர்களுக்காக, 53 இடங்களில் 237 வாக்குச்சாவடி மையங்கள் அமைக்கப்பட்டு வாக்குப்பதிவு நடைபெற்றது. இதில்,  ஒரு லட்சத்து 54 ஆயிரத்து 657 வாக்காளர்கள் தங்களது வாக்குகளை பதிவு செய்தனர்.
அதாவது, மொத்தம் 67.97 சதவீதம் வாக்குகள் பதிவானதாக தேர்தல் ஆணையம் அதிகாரப்பூர்வமாக அறிவித்தது. 

வாக்குப்பதிவு முடிந்தவுடன், சீல் வைக்கப்பட்ட வாக்குப்பதிவு இயந்திரங்கள் சித்தோட்டில் உள்ள அரசு பொறியியல் கல்லூரி வாக்கு எண்ணும் மையத்திற்கு கொண்டு செல்லப்பட்டன. பின்னர் அந்த மின்னணு வாக்குப்பதிவு இயந்திரங்கள் பாதுகாப்பு அறையில் பூட்டி சீல் வைக்கப்பட்டன. இதையடுத்து, இன்று (பிப். 8) ஈரோடு கிழக்கு தொகுதி இடைத்தேர்தலின் வாக்கு எண்ணிக்கை நடைபெற்று வருகிறது. 

காலை 8 மணிக்கு தொடங்கிய இந்த வாக்கு எண்ணிக்கையில் முதலில் தபால் வாக்குகள் எண்ணப்பட்டன. இதில், திமுக வேட்பாளர் 935 வாக்குகளும், நாம் தமிழர் கட்சி வேட்பாளர் 137 வாக்குகளும் பெற்று முன்னிலையில் இருந்தனர். இதையடுத்து நடைபெற்ற வாக்கு எண்ணிக்கையில் திமுக வேட்பாளர் சந்திரகுமார் 18 ஆயிரத்து 873 வாக்குகளும், நாம் தமிழர் கட்சி வேட்பாளர் சீதாலட்சுமி இரண்டாயிரத்து 268 வாக்குகள் பெற்று பின் தங்கியுள்ளார்.

வாக்கு எண்ணும் மையத்தில் நான்கு அடுக்கு போலீஸ் பாதுகாப்பு போடப்பட்டுள்ளது. மேலும், அசம்பாவிதங்கள் ஏற்படாமல் இருக்க பலத்த பாதுகாப்பு ஏற்பாடுகள் செய்யப்பட்டுள்ளது. 

ஈரோடு கிழக்கு தொகுதி, இடைத்தேர்தல், Erode by election