தமிழகத்தில் மழைக்கு வாய்ப்பு.. வெளியான வானிலை அப்டேட்

தமிழகத்தில் சில நாட்களாகவே வெயில் தாக்கம் அதிகளவில் காணப்படுகிறது. மார்ச் மாதத்திலேயே வெயில் கொளுத்துவதால், ஏப்ரல் , மே மாதங்களில் இன்னும் அதிகளவில் வெப்பத்தின் தாக்கம் இருக்கும் என்று எதிர்பார்க்கப்படுகிறது. இந்த நிலையில், தமிழகத்திற்கு மிக கனமழைக்கான ஆரஞ்சு அலர்ட் விடுக்கப்பட்டுள்ளது.  பூமத்திய ரேகையை ஒட்டிய வடகிழக்கு இந்தியப் பெருங்கடல் மற்றும் அதனை ஒட்டிய தென்கிழக்கு வங்கக்கடல் பகுதிகளின் மேல் ஒரு வளிமண்டல மேலடுக்கு சுழற்சி நிலவுகிறது.

லேசானது முதல் கனமழை

மார்ச் - 9 ஆம் தேதி தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை  நிலவக்கூடும். காலை வேளையில் பொதுவாக லேசான பனிமூட்டம் காணப்படும். மார்ச் -10 ஆம் தேதி கடலோர தமிழகத்தில் ஒருசில இடங்களிலும், உள்தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய, லேசானது முதல் மிதமான மழை  பெய்யக்கூடும்.   

மார்ச் -11 ஆம் தேதி தமிழகம், புதுவை மற்றும் காரைக்கால் பகுதிகளில்  அநேக இடங்களில் இடி, மின்னலுடன் கூடிய  லேசானது முதல் மிதமான மழை பெய்யக்கூடும். கன்னியாகுமரி, திருநெல்வேலி, தென்காசி மற்றும் தூத்துக்குடி மாவட்டங்களில் ஓரிரு இடங்களில்  கன முதல் மிக கனமழையும், விருதுநகர், சிவகங்கை, மயிலாடுதுறை, தஞ்சாவூர், திருவாரூர், நாகப்பட்டினம், புதுக்கோட்டை மற்றும் ராமநாதபுரம் மாவட்டங்களில் ஓரிரு இடங்களிலும், காரைக்கால் பகுதிகளிலும் கனமழை பெய்ய வாய்ப்புள்ளது.

மார்ச் -12, 13 ஆகிய தேதிகளில் தமிழகம், புதுவை மற்றும் காரைக்கால் பகுதிகளில்  ஓரிரு இடங்களில் இடி, மின்னலுடன் கூடிய   லேசானது முதல் மிதமான மழை  பெய்யக்கூடும். மார்ச் 14, 15 ஆகிய தேதிகளில் தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை  நிலவக்கூடும்.

வெப்பநிலை

09-03-2025 முதல் 11-03-2025 வரை:தமிழகம், புதுவை மற்றும் காரைக்கால் பகுதிகளில்  அதிகபட்ச  வெப்பநிலையில்  பெரிய  மாற்றத்திற்கான வாய்ப்பு குறைவு. 09-03-2025  மற்றும் 10-03-2025:   தமிழகத்தில் அதிகபட்ச  வெப்பநிலை  ஒருசில இடங்களில்   2  – 3° செல்சியஸ் இயல்பை விட அதிகமாக இருக்கக்கூடும்.

சென்னையில் பனிமூட்டம்

சென்னையில், வரும் மார்ச் 9 ஆம் தேதி அதிகாலை வேளையில் பொதுவாக லேசான பனிமூட்டம் காணப்படும் என்றும், அதிகபட்ச வெப்பநிலை  33 - 34° செல்சியஸை ஒட்டியும், குறைந்தபட்ச வெப்பநிலை 23 - 24° செல்சியஸை ஒட்டியும்  இருக்கக்கூடும் என்றும் கூறப்பட்டுள்ளது. மார்ச் 10 ஆம் தேதி, வானம் ஓரளவு மேகமூட்டத்துடன் காணப்படும் என்றும்,  நகரின் ஒருசில பகுதிகளில் இடி, மின்னலுடன் கூடிய  லேசான முதல் மிதமான மழை பெய்ய வாய்ப்புள்ளது. அதிகபட்ச வெப்பநிலை   33 - 34° செல்சியஸை ஒட்டியும், குறைந்தபட்ச வெப்பநிலை 23 - 24° செல்சியஸை ஒட்டியும்  இருக்கக்கூடும் வானிலை ஆய்வு மையம் தெரிவித்துள்ளது. 

மீனவர்களுக்கு எச்சரிக்கை

குமரிக்கடல் பகுதிகள், மன்னார் வளைகுடா, தென்தமிழக கடலோரப் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்ககூடும் என்றும் இதனால் மீனவர்கள் 2025 மார்ச் 11ஆம் தேதி முதல் 2025 மார்ச் 13ஆம் தேதி வரை கடல் பகுதிகளுக்கு மீனவர்கள் செல்ல வேண்டாம் என்று வானிலை மையம் அறிவுறுத்தியுள்ளது.