தஞ்சாவூர் மாவட்டம், தெலுங்கன்குடிகாடு கிராமத்தைச் சேர்ந்தவர் வைத்திலிங்கம். இவர் அ.தி.மு.க., சார்பில் போட்டியிட்டு, ஒரத்தநாடு தொகுதி சட்டமன்ற உறுப்பினரானார். மறைந்த முன்னாள் முதலமைச்சர் ஜெயலலிதா அமைச்சரவையில் 2001 - 2006 வரை தொழில் மற்றும் வனத்துறை அமைச்சராக இருந்தார்.

2011 - 2016இல் வீட்டு வசதி மற்றும் நகர்ப்புற வளர்ச்சித் துறை அமைச்சராக இருந்தார். பிறகு 2016 - 2021, ஜூன் வரை, ராஜ்யசபா எம்.பி.,யாக பதவி வகித்தார். தற்போதும், ஒரத்தாடு தொகுதி எம்.எல்.ஏ.,வாக உள்ளார். முன்னாள் முதல்வர் பன்னீர்செல்வத்தின் ஆதரவாளராக உள்ளார்.

வைத்திலிங்கம், வீட்டு வசதித்துறை அமைச்சராக இருந்தபோது, சென்னை பெருங்களத்துாரில், ஸ்ரீராம் பிராப்பர்டீஸ் அண்டு இன்ப்ராஸ்ட்ரக்சர் என்ற நிறுவனம், 57.94 ஏக்கரில், 1,453 அடுக்குமாடி குடியிருப்புகள் கட்டவும், ஐ.டி., நிறுவனங்கள் கட்டவும் தீர்மானித்தது. இதற்கான அரசு அனுமதி பெறுவதற்காக, வைத்திலிங்கத்துக்கு 27.90 கோடி ரூபாய் லஞ்சம் பெற்றதாக அறப்போர் இயக்கம் சார்பில் லஞ்ச ஒழிப்பு துறையில் புகார் அளிக்கப்பட்டது.

இதன்படி, 2011ல், 32.47 கோடி ரூபாயாக இருந்த சொத்து மதிப்பு, தற்போது, 1,057.85 சதவீதம் அளவுக்கு உயர்ந்துள்ளது. அத்துடன், லஞ்சப்பணம், பாரத் கோல் கெமிக்கல் லிமிடெட் என்ற நிறுவனம் வாயிலாக, வைத்திலிங்கத்தின் மகன்கள் பிரபு மற்றும் சண்முகபிரபு ஆகியோர் இயக்குனர்களாக இருக்கும் முத்தம்மாள் எஸ்டேட் பிரைவேட் லிமிடெட் நிறுவனத்துக்கு, 2016 ஜனவரி, 28 முதல் பிப்., 4ஆம் தேதி வரை கடனாக வழங்கப்பட்டது போல கணக்கு காட்டப்பட்டு உள்ளது.

இதனையடுத்து, வருமானத்திற்கு அதிகமான சொத்து சேர்த்தல், முறைகேடான பண பரிவர்த்தனை போன்ற புகாரின் அடிப்படையில், அமலாக்கத் துறையினர் காலை சுமார் 7:30 மணிக்கு வைத்திலிங்கத்திற்கு சொந்தமான தெலுங்கன்குடிகாட்டில் உள்ள அவரது வீட்டில் 5 கார்களில், 15பேர் கொண்ட குழுவினர் ஆய்வு மேற்கொண்டு வருகின்றனர்.

வைத்திலிங்கம் வீட்டின் முன்பு அவரது ஆதரவாளர்கள் ஏராளமான குவிந்துள்ளனர். மேலும், வைத்திலிங்கம் அவரது குடும்ப உறுப்பினர்களிடமும் அமலாக்கத்துறையினர் விசாரணை நடத்தி வருகின்றனர். மத்திய பாதுகாப்பு படை பிரிவு போலீசார் பாதுகாப்பு பணியில் ஈடுபட்டுள்ளனர். சென்னை சேப்பாக்கம் எம்எல்ஏ விடுதியில் உள்ள அவரது அறைகள் மற்றும் ஒரத்தநாட்டில் உள்ள வீடு மற்றும் அவருக்கு சொந்தமான இடங்களில் சோதனை நடைபெற்றது.

அதேபோல, தஞ்சை அருளானந்த நகர் விரிவாக்கத்தில் உள்ள வைத்திலிங்கம் மகன் பிரபு வீட்டில் 4 பேர் கொண்ட அமலாக்கத் துறையினர் சோதனை நடத்தி வருகின்றனர். அவர்கள் வந்த நேரத்தில் பிரபு வீட்டில் இல்லாத காரணத்தால் அமலாக்க துறையினர் காத்திருந்தனர். தகவலறிந்த பிரபு சொந்த கிராமத்தில் இருந்து கார் மூலம் அருளானந்த நகரில் உள்ள தனது வீட்டிற்கு வந்து அமலாக்கத்துறை விசாரணைக்கு நேரில் ஆஜரானார்.

தஞ்சை ஒரத்தநாடு அருகே முன்னாள் அதிமுக அமைச்சர் வைத்திலிங்கம் வீட்டில் அமலாக்கத்துறை சுமார் 5 மணி நேரமாக சோதனை நடத்தி வரும் நிலையில் வீட்டு வாசலில் முன்னாள் சுற்றுலாத்துறை அமைச்சர் வெல்லமண்டி நடராஜன் மற்றும் தொண்டர்கள் வெளியே காத்திருந்தனர்.

இந்த நிலையில் திடீரென்று வீட்டிலிருந்து வெளியே வந்த வைத்திலிங்கம், ‘அனைவரும் வீட்டு வாசலில் நிற்க வேண்டாம்.. அனைவரும் சென்று சாப்பிட்டு வாருங்கள்’ என வெளியே வந்து முன்னாள் அமைச்சர் வெல்லமண்டி நடராஜன் மற்றும் தொண்டர்களிடம் சொல்லி கூலாக அனுப்பி வைத்தது அனைவரையும் ஆச்சர்யத்தில் ஆழ்த்தியது.