ஐ.நா. வில் ட்ரம்பின் பகடைப் பேச்சு ! டென்ஷனான பகை நாடுகள் !

ஐக்கிய நாடுகள் சபையின் 81-வது பொதுச்சபை கூட்டத்தில் உரையாற்றிய அமெரிக்க அதிபர் டொனால்ட் டிரம்ப், உலக பாதுகாப்பு விவகாரங்களில் அமெரிக்காவின் அணுகுமுறை, ஈரான் மீதான நிலைப்பாடு, வெனிசுலா நடவடிக்கைகள் மற்றும் உக்ரைன் போர் உள்ளிட்ட பல்வேறு சர்வதேச விவகாரங்கள் குறித்து பேசினார். அமெரிக்காவின் ராணுவ வலிமை உலகளாவிய பாதுகாப்பை உறுதி செய்வதற்காக பயன்படுத்தப்படுவதாக அவர் தெரிவித்தார்.

சர்வதேச அச்சுறுத்தல்களை எதிர்கொள்வதில் உலக நாடுகள் போதிய நடவடிக்கைகளை எடுக்கவில்லை என விமர்சித்த டிரம்ப், அமெரிக்கா தனது தேசிய நலன்களையும் பாதுகாப்பு கொள்கைகளையும் முன்னிலைப்படுத்தி செயல்படும் எனக் கூறினார்.

ஈரான் அணு திட்டம் குறித்து கடும் எச்சரிக்கை :

ஈரான் தொடர்பாக பேசிய டிரம்ப், அந்த நாடு அணுஆயுத திறனைப் பெறுவதை அமெரிக்கா ஏற்றுக்கொள்ளாது என திட்டவட்டமாக தெரிவித்தார். அணுஆயுத திட்டங்களை கைவிட்டு பேச்சுவார்த்தைக்கு ஈரான் முன்வர வேண்டும் என்றும், இல்லையெனில் கடுமையான விளைவுகளை எதிர்கொள்ள வேண்டிய சூழல் உருவாகும் என்றும் அவர் எச்சரித்தார்.

டிரம்பின் உரையில் ஈரான் குறித்த கருத்துக்கள் இடம்பெற்றபோது, ஐ.நா. பொதுச்சபை கூட்டத்தில் பங்கேற்ற ஈரான் பிரதிநிதிகள் எதிர்ப்பு தெரிவிக்கும் வகையில் கூட்ட அரங்கில் இருந்து வெளியேறினர். இதேபோல் கியூபா பிரதிநிதிகளும் கூட்டத்தை புறக்கணித்து வெளிநடப்பு செய்தனர்.

வெனிசுலா நடவடிக்கையை சாதனையாக குறிப்பிட்ட டிரம்ப் :

வெனிசுலா அரசியல் சூழல் குறித்து பேசிய அமெரிக்க அதிபர், முன்னாள் அதிபர் நிக்கோலஸ் மதுரோவை கைது செய்வதற்காக மேற்கொள்ளப்பட்ட நடவடிக்கையை தனது நிர்வாகத்தின் முக்கிய சாதனைகளில் ஒன்றாக குறிப்பிட்டார்.

மேலும், கரீபியன் மற்றும் பசிபிக் பகுதிகளில் சந்தேகத்திற்கிடமான கப்பல்கள் மீது மேற்கொள்ளப்பட்ட ட்ரோன் தாக்குதல்களையும் அவர் ஆதரித்து பேசினார். வெனிசுலாவின் அரசியல் மாற்றங்கள் குறித்து நம்பிக்கை தெரிவித்த டிரம்ப், அந்நாட்டில் புதிய நிர்வாக மாற்றங்கள் ஏற்பட வாய்ப்பு இருப்பதாக குறிப்பிட்டார்.

போதைப்பொருள் கடத்தலுக்கு எதிராக கடும் நடவடிக்கை :

அமெரிக்காவின் எல்லைப் பாதுகாப்பு குறித்து பேசிய டிரம்ப், மெக்சிகோவில் செயல்படும் போதைப்பொருள் கடத்தல் குழுக்கள் குறித்து கவலை தெரிவித்தார். போதைப்பொருள் கடத்தலை கட்டுப்படுத்தவும், அமெரிக்க எல்லையை பாதுகாக்கவும் தேவையான கடுமையான நடவடிக்கைகள் தொடர்ந்து எடுக்கப்படும் என அவர் கூறினார்.

உக்ரைன் போரை முடிவுக்கு கொண்டு வர வேண்டும் :

ரஷ்யா-உக்ரைன் இடையேயான போர் குறித்து பேசிய டிரம்ப், இரு நாடுகளின் தலைவர்களுடனும் பேச்சுவார்த்தை நடத்தி மோதலை முடிவுக்கு கொண்டு வர முயற்சி செய்து வருவதாக தெரிவித்தார்.

"உக்ரைனில் மனித உயிர்கள் பலியாவதை உடனடியாக நிறுத்த வேண்டும்" என்று அவர் வலியுறுத்தினார். போர் காரணமாக ஏற்படும் உயிரிழப்புகளை முடிவுக்கு கொண்டுவர சர்வதேச நாடுகள் ஒன்றிணைந்து செயல்பட வேண்டும் என்றும் அவர் குறிப்பிட்டார்.

செயற்கை நுண்ணறிவு விவகாரத்தில் அமெரிக்காவின் நிலைப்பாடு :

செயற்கை நுண்ணறிவு தொழில்நுட்பத்தை கட்டுப்படுத்தும் சர்வதேச விதிமுறைகள் குறித்தும் டிரம்ப் தனது கருத்துகளை தெரிவித்தார். அமெரிக்காவின் தொழில்நுட்ப வளர்ச்சியை பாதிக்கும் வகையிலான கட்டுப்பாடுகளை ஏற்க முடியாது என்றும், ஒவ்வொரு நாட்டின் இறையாண்மைக்கும் முக்கியத்துவம் அளிக்க வேண்டும் என்றும் அவர் கூறினார்.

சர்வதேச நாடுகளில் எதிர்வினை :

டிரம்பின் உரை அமெரிக்காவின் பாதுகாப்பு மற்றும் வெளிநாட்டு கொள்கைகளை மையமாக கொண்டிருந்த நிலையில், சில நாடுகள் அவரது கருத்துகளுக்கு எதிர்ப்பு தெரிவித்தன. குறிப்பாக ஈரான் மற்றும் கியூபா பிரதிநிதிகளின் வெளிநடப்பு ஐ.நா. கூட்டத்தில் கவனம் பெற்றது.

உலக அரசியல், பாதுகாப்பு மற்றும் சர்வதேச உறவுகளில் அமெரிக்காவின் புதிய அணுகுமுறை குறித்து தொடர்ந்து விவாதங்கள் நடைபெற்று வரும் நிலையில், டிரம்பின் ஐ.நா உரை முக்கியத்துவம் பெற்றுள்ளது.