'குட்ட குட்ட குனிய மாட்டோம்; நிமிர்ந்து நடைபோடுவோம்'- முதல்வர் ஸ்டாலின்

திமுக தலைவரும் முதல்வருமான மு.க.ஸ்டாலின் தலைமையில் அண்ணா அறிவாலயத்தில் இன்று திமுக எம்பிக்கள் கூட்டம் நடைபெற்றது. இதில் கோவை, மதுரை மெட்ரோ ரயில் திட்டங்களை பிரதமர் தலையிட்டு அனுமதிக்க வேண்டும், மத்திய பாஜக அரசின் வஞ்சகத்திற்கு எடப்பாடி பழனிசாமி துணைபோக வேண்டாம் உள்ளிட்ட 12 தீர்மானங்கள் நிறைவேற்றப்பட்டது.

முதல்வர் ஸ்டாலின் எக்ஸ் பதிவு

இந்த கூட்டத்திற்கு பிறகு முதல்வர் ஸ்டாலின் தனது எக்ஸ் பக்கத்தில், "மிகப்பெரிய ஜனநாயக நாடு என்று பெருமையாகச் சொல்லிக்கொண்டே, தமிழ்நாட்டு மக்களின் குரலை மத்திய பா.ஜ.க. அரசு புறக்கணிப்பது சரியா?

தமிழ்நாட்டின் கோரிக்கைகளை - தேவைகளைக் கடிதங்களாக, நேரில் மனுக்களாக, சட்டமன்றத் தீர்மானங்களாக எடுத்துச் சொல்லியும் காதில் வாங்காமல் இருப்பது நியாயமல்ல!

'குட்ட குட்ட குனிய மாட்டோம்'

அதிகமான வரி வருவாயைத் தரும் மாநிலமான தமிழ்நாட்டுக்கு வஞ்சனை செய்வதை மனச்சாட்சியுள்ள யாரும் ஏற்றுக்கொள்ள மாட்டார்கள். உங்கள் வஞ்சனைகளைக் கடந்துதான் நாட்டிலேயே அதிகமான 11.19% பொருளாதார வளர்ச்சியை அடைந்திருக்கிறோம். குட்ட குட்ட குனிய மாட்டோம்; நிமிர்ந்து நடைபோடுவோம்!

வருகின்ற நாடாளுமன்றக் கூட்டத்தொடரில், தமிழ்நாட்டு மக்களின் பிரதிநிதிகளிடம் மத்திய பா.ஜ.க. அரசு பதில் சொல்லியே ஆகவேண்டும்" என்று குறிப்பிட்டுள்ளார்.