LIVE 24 X 7
சென்னை செம்மஞ்சேரியில் உள்ள தனியார் கல்லூரியில் நடிகர் தனுஷின் நற்பணி இயக்கம் சார்பில் பிரம்மாண்ட மகளிர் அணி நிர்வாகிகள் கூட்டம் நேற்று (அக்.25) நடைபெற்றது. ரசிகர் மன்றத்தைச் 'தனுஷ் நற்பணி இயக்கம்' எனப் பெயர் மாற்றம் செய்து, புதிய லோகோ மற்றும் கொடியை அறிமுகப்படுத்திய பிறகு நடந்த முதல் மகளிர் அணி கூட்டம் என்பதால் இது பெருமளவில் கவனத்தைப் பெற்றது.
இக்கூட்டத்தில் பங்கேற்ற ஆயிரக்கணக்கான பெண் நிர்வாகிகளுக்குத் தனுஷ் நற்பணி இயக்கம் சார்பில் வெள்ளி காமாட்சி விளக்குகள் பரிசாக வழங்கப்பட்டன. இந்த விளக்குகளைப் பெற பிரத்யேகமாக ஆர்டர் கொடுத்து, அதன் அடிப்பகுதியில் தாமரை சின்னத்தைப் பொறித்து வழங்கியதாகத் தகவல்கள் வெளியாகியுள்ளன.
விளக்கின் அடியில் தாமரை சின்னம் பொறிக்கப்பட்டுள்ள புகைப்படங்கள் இணையதளங்களில் பரவி அரசியல் ரீதியான விவாதங்களைக் கிளப்பியுள்ளன. இது தனுஷின் வரவிருக்கும் அரசியல் கட்சிAயின் சின்னமா அல்லது பாஜகவின் ஆதரவில் அவர் தமிழ்நாடு அரசியலில் களமிறங்குவதைச் சுட்டிக்காட்டும் சிக்னலா என்ற கேள்விகளை நெட்டிசன்கள் எழுப்பி வருகின்றனர். எனினும், இந்த விவகாரம் குறித்து தனுஷ் தரப்பிலிருந்து இதுவரை எவ்வித அதிகாரப்பூர்வ விளக்கமும் அளிக்கப்படவில்லை.
நடிகர் தனுஷின் இந்த அரசியல் நகர்வுகள் குறித்துக் கருத்து தெரிவித்துள்ள காங்கிரஸ் கட்சியின் தமிழக தலைவர் மாணிக்கம் தாகூர், தமிழ்நாட்டில் பாஜக தனது பி மற்றும் சி திட்டங்களைச் செயல்படுத்தி வருவதாகக் குற்றம்சாட்டியுள்ளார்.
அவர் பேசுகையில், "தமிழ்நாட்டில் பாஜக சார்பாகக் களமிறக்கப்பட்ட எடப்பாடி மற்றும் தினகரனை மக்கள் நிராகரித்துவிட்டனர். தற்போது பி பிளானில் அண்ணாமலைக்கு புதிய முகமூடி கொடுத்து NGO போலச் செயல்பட வைத்துள்ளனர். அடுத்து சி பிளானில் ஒரு புதிய நடிகரை வைத்துத் தமிழ்நாட்டில் குழப்பத்தை ஏற்படுத்தப் பார்க்கிறார்கள். இதற்கான ரிமோட் கன்ட்ரோல் டெல்லியில் அமித் ஷாவிடம் உள்ளது. இதற்குப் பெயர் 'ஆபரேஷன் D'. அதிமுகவின் சினிமா சார்ந்த வாக்கு வங்கியைக் கைப்பற்றவே பாஜக மற்றும் ஆர்.எஸ்.எஸ் பல ஆண்டுகளாக முயன்று வருகிறது" என்று விமர்சித்துள்ளார்.
சமீபத்தில் தனது பிறந்தநாளுக்கு முன்பாகச் சென்னையில் ரசிகர்களைச் சந்தித்தது, கோவையில் மாநில நிர்வாகிகள் கூட்டத்தைக் கூட்டி நற்பணி இயக்கமாக மாற்றியது மற்றும் டெல்லி விசிட் அடித்தது வரை தனுஷின் ஒவ்வொரு நகர்வும் உற்றுநோக்கப்படுகிறது. 2031-ஆம் ஆண்டு தமிழ்நாடு சட்டமன்றத் தேர்தலைக் குறிவைத்து 'தமிழக எழுச்சிக் கழகம்' என்ற பெயரில் அவர் கட்சி தொடங்க வாய்ப்பிருப்பதாக அரசியல் வட்டாரத்தில் பேசப்பட்டு வரும் சூழலில், இந்தத் தாமரை பொறிக்கப்பட்ட விளக்கு விவகாரம் தமிழ்நாடு அரசியல் களத்தில் புதிய விவாதத்தை ஏற்படுத்தியுள்ளது.
