ம.பொ.சிவஞானம் 29ஆவது நினைவு நாளை முன்னிட்டு சென்னை, தியாகராய நகரில் அமைந்துள்ள அவரது திருவுருவச் சிலைக்கு நாம் தமிழர் கட்சியின் ஒருங்கிணைப்பாளர் சீமான் மாலை அணிவித்து மலர் தூவி மரியாதை செலுத்தினார். இதையடுத்து செய்தியாளர்களை சந்தித்த அவர், “இந்தியா முழுவதும் பூரண மதுவிலக்கு என்று கூறுவதற்கு முன்பு குஜராத் மாநிலம் போன்று தமிழ்நாட்டில் மதுக்கடைகளை நாம் முதலில் மூட வேண்டும். மதுக்கடையை திறந்த திமுகவிற்கு மூடுவதில் என்ன பிரச்சனை? வெட்டி பேச்சாக வெறும் வார்த்தைகளில் மாநில உரிமைகளை பற்றி திமுகவும் திமுக கூட்டணியும் பேசுவதில் எந்த பயனும் இல்லை. மதுவை ஒழிக்கும் மாநிலங்களுக்கு கூடுதல் நிதி பகிர்வு என்பது சரியான கோரிக்கை

மாநிலங்களின் நிதிதான் மத்திய அரசின் நிதி. இந்தியாவின் நிதி வருவாயில் அதிக அளவில் கொடுப்பதில் தமிழகம்தான் 2ம் இடம். தேசிய அளவில் பூரண மதுவிலக்கை கொண்டு வரவேண்டும் என அமைச்சர் ரகுபதி கூறியது ஏற்புடையதல்ல. எந்த கோரிக்கை வைத்தாலும் அதை மத்திய அரசுதான் செய்ய முடியும் என்று மாற்றி விடுவது எல்லாம் ஏற்க முடியாது. மதுக்கடைகளை திறந்தது யார்?  நீங்கள் அதை மூடுவதில் உங்களுக்கு என்ன பிரச்சனை? அடுத்த காந்தி ஜெயந்தியில் மதுக்கடைகளை மூடுவேன் என்று தற்போதைய முதல்வர் ஸ்டாலின் முன்பு கூறினார். அவர் சொன்ன பிறகு எத்தனையோ காந்தி ஜெயந்தியை கொண்டாடி விட்டோம்.

கருணாநிதியின் பேரன், ஸ்டாலினுக்கு பிறந்த மகன் என்ற ஒரு தகுதியினாலே உதயநிதி ஸ்டாலின் துணை முதலமைச்சராக ஆக்கி இருக்கிறார்கள். தனக்குப் பிறகு தன் மகனுக்கு பதவி கொடுப்பதைதான் சனாதன தர்மம் கூறுகிறது. மு.க.ஸ்டாலின் தன்னுடைய வீட்டிலேயே சனாதனத்தை வைத்துக்கொண்டு வெளியில் சனாதானத்திற்கு எதிர்ப்பு தெரிவிப்பது எந்த வகையில் சமூகநீதி ஆகும்?” எனக் கேள்வி எழுப்பியுள்ளார்.