சென்னை கொரட்டூர் செந்தில் நகர் விரிவாக்கத்தை சேர்ந்தவர் திவ்யா. இவர்  கொரட்டூர் காவல் நிலையத்தில் புகார்  ஒன்றை அளித்தார். அதில் தன்னுடைய 73 வயதான தந்தை பாலசுந்தரம்  என்பவர் தேவி நகரில் தனியாக வசித்து வருவதாகவும், இந்நிலையில்  இரவில் கருப்பு நிற பர்தா அணிந்த நபர் ஒருவர் மிளகாய் பொடி தூவி,  இரும்பு கம்பியால் தனது தந்தையை தாக்கி அவரது கழுத்தில் இருந்த மூன்று சவரன் தங்கச் செயினை பறித்துக் கொண்டு தப்பிச் சென்றதாகவும் புகார் அளித்திருந்தார்.

இது குறித்து கொரட்டூர் போலீசார் வழக்கு பதிவு செய்து சம்பவ இடத்திற்கு சென்று அங்கிருந்த சிசிடிவி பதிவுகளை ஆராய்ந்து நகையை பறித்துச் சென்றது யார் என விசாரித்து வந்தனர். இந்நிலையில், சந்தேகத்தின் அடிப்படையில், பாலசுந்தரத்தின் வீட்டின் அருகே உள்ள மளிகை கடைக்கு  சென்ற  இளம்பெண்ணை பிடித்து போலீசார் விசாரித்தனர்.

விசாரணை செய்ததில் பாலசுந்தரம் வீட்டின் அருகே இருக்கும் மளிகை கடை நடத்துபவரின் மகள் செயின் பறிப்பில் ஈடுபட்டது தெரியவந்துள்ளது. பட்டதாரி பெண்ணான இவர் செயின் பறிப்பில் ஈடுபட காரணம் என்ன என விசாரணை செய்ததில் பல திடுக்கிடும் தகவல் வெளியானது.  பட்டதாரியான இவர், ஐ.டி நிறுவனம் ஒன்றில் வேலை பார்த்துள்ளார். சில மாதங்களுக்கு முன் வேலையில் இருந்து வெளியேறி, பெற்றோர் நடத்தி வரும் மளிகை கடையை கவனித்து வந்துள்ளார்.

கடையில் வேலை பார்க்கும் போது பொழுது போகாமல் ஆன்லைன் பெட்டிங்கில் ஈடுபட்டுள்ளார். அந்த பெட்டிங் செயலியில் சிறிது சிறிதாக பணத்தை இழந்துள்ளார். மளிகையை கடையில் கிடைத்த பணம் முழுவதும் பெட்டிங் செயலியில் இழந்ததால் மீண்டும் அந்த பணத்தை தந்தை கேட்டால், என்ன செய்வது என யோசித்தபோது, தற்கொலை செய்ய நினைத்ததாகவும் அதன் பின் பயந்து அந்த முடிவை கைவிட்டதாகவும் தெரிவித்துள்ளார்.

இதனால் தான், கடையின் அருகே இருந்த வீட்டில் வசிக்கும் முதியவரின் நகையை திருடியதாகவும் அவர் ஒப்புக்கொண்டார். இந்நிலையில், கைது செய்யப்பட்ட பெண்ணிடமிருந்து 1 சவரன் நகை மற்றும் முதியவரை தாக்க பயன்படுத்தப்பட்ட ஸ்பேனர் உள்ளிட்டவற்றை போலீசார் பறிமுதல் செய்தனர். விசாரணைக்குப் பிறகு அவரை நீதிமன்றத்தில் ஆஜர் படுத்தி சிறையில் அடைத்தனர்.

ஆன்லைன் பெட்டிங் செயலியில் பணத்தை இழந்து, அதற்காக செயின் பறிப்பில் ஈடுபட்டு பட்டதாரி பெண் ஒருவர் சிறைக்கு சென்ற சம்பவம் அப்பகுதியில் பரபரப்பை ஏற்படுத்தி உள்ளது.