ஓ.எஸ்.டி. பிலிம்ஸ் நிறுவனத்தின் உரிமையாளர் ராம சரவணன் என்பவர் தாக்கல் செய்த மனுவில், இயக்குநர் கே.எஸ்.அதியமான் இயக்கத்தில் உதயநிதி ஸ்டாலின் கதாநாயகனாக நடிக்க  ‘ஏஞ்சல்’ என்ற படத்தை தயாரிக்க முடிவு எடுக்கப்பட்டது. இதில், நடிகைகள் ஆனந்தி, பாயல் ராஜ்புத் மற்றும் யோகிபாபு முக்கிய கதாபாத்திரத்தில் நடித்திருந்தனர்.

 கடந்த 2018-ஆம் ஆண்டு இப்படத்தின் படப்பிடிப்பு தொடங்கிய நிலையில் 80 சதவிகித படப்பிடிப்பு நிறைவடைந்து விட்டது. தொடர்ந்து, இருபது சதவீத படப்பிடிப்பு நடத்த வேண்டியுள்ள சூழலில் 'ஏஞ்சல்' படத்தை நிறைவு செய்யாமல் 'மாமன்னன்' படத்தில் நடித்த உதயநிதி அந்த படமே தனது கடைசி படம் என கூறியுள்ளதாக தெரிவித்துள்ளார்.

மேலும் படிக்க: சிவகார்த்திகேயன் பிறந்தநாள்: ‘பராசக்தி’ மேக்கிங் வீடியோ வெளியிட்டு சுதா கொங்கரா வாழ்த்து

மேலும் ‘ஏஞ்சல்’ படத்திற்காக இதுவரை 13 கோடி ரூபாய் செலவிட்டுள்ள நிலையில் ஒப்பந்தப்படி, இன்னும் எட்டு நாட்கள் கால்ஷீட் தராமல் உதயநிதி புறக்கணித்து வருவதாக குற்றம்சாட்டினார். ‘ஏஞ்சல்’ படத்தின் எஞ்சிய படப்பிடிப்பை நிறைவு செய்து தர வேண்டுமெனவும் 25 கோடி ரூபாய் இழப்பீடாக வழங்க வேண்டுமெனவும் ஓ.எஸ்.டி. பிலிம்ஸ் நிறுவனத்தின் உரிமையாளர் ராம சரவணன் கோரிக்கை வைத்திருந்தார்.

இந்த வழக்கை விசாரித்த தனி நீதிபதி, ஓ.எஸ்.டி. பிலிம்ஸ் நிறுவனத்தின் உரிமையாளர் ராம சரவணன் மனுவை தள்ளுபடி செய்து உத்தரவிட்டார்.  இந்த உத்தரவை எதிர்த்து ராம சரவணன் தாக்கல் செய்துள்ள மேல்முறையீட்டு வழக்கு நீதிபதிகள் அனிதா சுமந்த் மற்றும் குமரப்பன் அமர்வில் இன்று விசாரணைக்கு வந்தது. அப்போது மனு தொடர்பாக துணை முதல்வர் உதயநிதி ஸ்டாலின் பதிலளிக்க உத்தரவிட்ட நீதிபதிகள், விசாரணையை மார்ச் 18-ஆம் தேதிக்கு தள்ளிவைத்து உத்தரவிட்டனர்.