சினிமா

முத்துவேல் பாண்டியன் வேட்டை ஆரம்பம்.. ’ஜெயிலர் 2’ நியூ அப்டேட்

ரஜினி நடிக்கும் ‘ஜெயிலர் 2’ திரைப்படத்தின் படப்பிடிப்பு இன்று முதல் தொடங்கியுள்ளதாக தயாரிப்பு நிறுவனம் போஸ்டர் வெளியிட்டு அதிகாரப்பூர்வமாக அறிவித்துள்ளது. 

முத்துவேல் பாண்டியன் வேட்டை ஆரம்பம்.. ’ஜெயிலர் 2’ நியூ அப்டேட்
ஜெயிலர் 2

கடந்த 2023-ஆம் ஆண்டு இயக்குநர் நெல்சன் இயக்கத்தில் ரஜினி நடிப்பில் வெளியான படம் ‘ஜெயிலர்’. இந்த படத்தில் ரஜினியுடன் ரம்யா கிருஷ்ணன், வசந்த் ரவி, யோகிபாபு, விநாயகன் உட்பட பலர் முக்கிய கதாபாத்திரத்தில் நடித்திருந்தனர். சன் பிக்சர்ஸ் நிறுவனம் தயாரித்திருந்த இப்படத்திற்கு அனிருத் இசையமைத்திருந்தார்.

இப்படத்தில் இடம்பெற்றிருந்த ‘காவாலா’ பாடலுக்கு நடிகை தமன்னா நடனமாடியிருந்தார். இந்த பாடல் மிகப்பெரிய அளவில் ஹிட் அடித்தது. ’ஜெயிலர்’ திரைப்படம் திரையரங்குகளில் வெளியாகி 600 கோடிக்கு மேல் வசூலை குவித்து சாதனை படைத்தது. இந்த பாகத்தின் வெற்றியைத் தொடர்ந்து ’ஜெயிலர்’ இரண்டாம் பாகம் இயக்க இயக்குநர் நெல்சன் திட்டமிட்டுள்ளதாக தகவல் வெளியானது.

அதுமட்டுமல்லாமல், தற்போது ரஜினி, இயக்குநர் லோகேஷ் கனகராஜ் இயக்கும் ‘கூலி’ திரைப்படத்தில் நடித்து வருவதால் அதன் படப்பிடிப்பு நிறைவடைந்ததும் ‘ஜெயிலர் 2’ திரைப்படத்தில் நடிப்பார் என்று கூறப்பட்டது. தொடர்ந்து, சமீபத்தில் ’ஜெயிலர் 2’ திரைப்படம் விரைவில் வெளியாகவுள்ளதாக தயாரிப்பு நிறுவனம் டீசர் ஒன்றை வெளியிட்டு அதிகாரப்பூர்வமாக அறிவித்திருந்தது.

இயக்குநர் நெல்சனும், இசையமைப்பாளர் அனிருத்தும் அமர்ந்து பேசுவது போன்று தொடங்கும் இந்த நான்கு நிமிட டீசரை ரசிகர்கள் சமூக வலைதளத்தில் வைரலாக்கினர். மேலும், 'ஜெயிலர் 2’ திரைப்படத்தின் அடுத்த அப்டேட் எப்போது வரும் என்ற எதிர்பார்ப்புடன் காத்திருந்தனர்.

இந்நிலையில், இப்படத்தின் புதிய அப்டேட்டை படக்குழு வெளியிட்டுள்ளது. அதன்படி, ‘ஜெயிலர் 2’ திரைப்படத்தின் படப்பிடிப்பு இன்று தொடங்கியுள்ளது. இதனை படக்குழு போஸ்டர் ஒன்றை வெளியிட்டு அறிவித்துள்ளது. இந்த அறிவிப்பால் உற்சாகமடைந்த ரசிகர்கள் படத்தில் யார்.. யார்? நடிக்கவுள்ளனர் என்று சமூக வலைதளத்தில் கேள்வி எழுப்பி வருகின்றனர்.

மேலும் படிக்க: மீண்டும் வரும் ‘ஜெயிலர்’.. சூப்பர் அப்டேட் கொடுத்த படக்குழு

’ஜெயிலர் 2’ திரைப்படத்தின் படப்பிடிப்பு தமிழ்நாடு, கேரளா, ஹைதராபாத், மும்பை உள்ளிட்ட பல மாநிலங்களில் நடைபெறவுள்ளதாக கூறப்படுகிறது. மேலும்,  முதல் பாகத்தில் பணிபுரிந்த தொழில்நுட்ப கலைஞர்களே இதிலும் பணிபுரிய உள்ளார்கள் என்றும்  ரஜினியுடன் வேறு யாரெல்லாம் இப்படத்தில் நடிக்கிறார்கள் என்ற அறிவிப்பு விரைவில் வெளியாகும் என்றும் எதிர்பார்க்கப்படுகிறது.