சென்னை புளியந்தோப்பு பகுதியைச் சேர்ந்த 9 வயது சிறுமி, அவரது மாமா முறை கொண்ட உறவினர் ஒருவரால் பாலியல் தொல்லைக்கு உள்ளான சம்பவம் பரபரப்பை ஏற்படுத்தியிருந்தது. அதாவது கடந்த 15ம் தேதி, சிறுமியின் பெற்றோர், பிறந்தநாள் நிகழ்ச்சி ஒன்றிற்காக அவர்களது உறவினர் வீட்டுக்குச் சென்றுள்ளனர். அப்போது அந்தச் சிறுமி தூங்கிக் கொண்டிருந்ததால், அவரை வீட்டிலேயே விட்டுவிட்டு சென்றதாக தெரிகிறது. சிறுமி அசந்து தூங்கிக் கொண்டிருந்ததை பார்த்த அவரது மாமா, வீட்டில் யாரும் இல்லாத நேரத்தில், சிறுமிக்கு பாலியல் தொல்லை கொடுத்ததாக சொல்லப்படுகிறது.    

இதுபற்றி அந்தச் சிறுமி தனது பெற்றோரிடம் கூறியுள்ளார். இதனை கேட்டு அதிர்ச்சியான சிறுமியின் பெற்றோர், இந்த சம்பவம் குறித்து புளியந்தோப்பு அனைத்து மகளிர் காவல்நிலையத்தில் புகார் அளித்துள்ளனர். அதன்பின்னர் விசாரணை நடத்திய போலீஸார், 41 வயதான சிறுமியின் மாமா மீது போக்சோவின் கீழ் வழக்குப்பதிவு செய்தனர். தன் மீது போக்சோ வழக்குப் பதிவு செய்யப்பட்டுள்ளதை அறிந்த சிறுமியின் மாமா, மன உளைச்சலில் இருந்ததாக சொல்லப்படுகிறது. இந்நிலையில், விசாரணைக்கு பயந்த அவர், வீட்டிலேயே தூக்கிட்டு தற்கொலை செய்து கொண்டார்.

இதுகுறித்து தகவல் அறிந்த புளியந்தோப்பு போலீசார், சம்பவ இடத்திற்குச் சென்று அவரது உடலை கைப்பற்றி விசாரணை நடத்தினர். சிறுமிக்கு பாலியல் தொல்லை செய்து போக்சோ வழக்கில் சிக்கியதால், குற்றம்சாட்டப்பட்ட நபர் விசாரணைக்கு பயந்து தற்கொலை செய்துகொண்டது, அப்பகுதியில் பரபரப்பை ஏற்படுத்தியுள்ளது.