வி.சாலை விவசாயிகளுக்கு விருந்து.. கட்டுப்பாடுகள் விதித்த கட்சி தலைமை..!

தமிழக வெற்றி கழகத்தின் முதல் மாநாட்டிற்கு இடம் கொடுத்த நில உரிமையாளர்கள் மற்றும் விவசாயிகளுக்கு வழங்கப்படும் விருந்து நிகழ்ச்சியில் சில கட்டுப்பாடுகள் விதிக்கப்பட்டுள்ளது. 

த.வெ.க மாநாட்டில் முதலில் கட்சியின் மாநாடு நடைபெறும் என்று அறிவித்த நாள் முதல் பல்வேறு தடைகள் வந்த வண்ணம் இருந்தது. சேலம், திருச்சி, மதுரை எனத்தொடங்கி பல இடங்களில் மாநாடு நடைபெறும் என அறிவிக்கப்பட்ட நிலையில், மாநாட்டிற்கான இடம் தேர்வு பெரிய பிரச்சினையாக அமைந்தது. கடைசியில், விழுப்புரம் மாவட்டம் வி.சாலையில் மாநாடு நடத்தப்படும் என்று அதிகாரப்பூர்வமாக அறிவிக்கப்பட்டது. 

தமிழக வெற்றிக் கழகத்தின முதல் மாநில மாநாடு கடந்த அக்டோபர் மாதம் 27 ஆம் தேதி விழுப்புரம் மாவட்டம் விக்கிரவாண்டியை அடுத்த வி.சாலையில் நடைபெற்றது. இந்த மாநாட்டிற்கு வி.சாலை பகுதியில் சுமார் 170 ஏக்கர் நிலம் ஒதுக்கப்பட்டு, மாநாடு பிரமாண்டமாக நடைபெற்றது. த.வெ.க மாநாட்டில் பத்து லட்சத்திற்கும் மேற்பட்டோர் கலந்து கொண்ட நிலையில், த.வெ.க. தலைவர் விஜய் தனது கட்சியின் கொள்கைகளை விஜய் அறிவித்தார். 

த.வெ.க மாநாட்டை நடத்த தமிழக அரசும் பல கட்டுப்பாடுகளை அறிவுறுத்தியது. அதனைத்தொடர்ந்து மாநாட்டிற்கு இடம் தேர்வு செய்யும் வேலையும் மும்மரமாக நடைபெற்றது. மாநாட்டிற்காக இடம் கொடுத்தவர்களுக்கு பணம் வழங்கப்பட்டது. உடன் மாடுகள், கன்றுகள் வழங்கப்பட்டது. அப்போதே நிலம் கொடுத்தவர்களுக்கு சென்னையில் விருந்தளிக்கப்படும் என்று தகவல் வெளியானது. 

த.வெ.க மாநாட்டிற்கு வி.சாலை பகுதியில் சுமார் 170 ஏக்கர் நிலம் ஒதுக்கப்பட்டு, மாநாடு பிரமாண்டமாக நடைபெற்றது.  மாநாட்டிற்கு நிலங்களை பயன்படுத்திவிட்டு மீண்டும் விவசாய பயன்பாட்டிற்கு ஏற்ற வகையில் ஏற்பாடு செய்து கொடுப்பதாக ஒப்பந்தம் செய்யப்பட்டது. இந்நிலையில் மாநாட்டிற்காக இடம் கொடுத்த விவசாயிகளுக்கு இன்று பனையூரில் வைத்து, விருந்தளிக்கும் நிகழ்ச்சி நடைபெறுகிறது.

சென்னை பனையூரில் உள்ள கட்சி அலுவலகத்தில் இன்று மதியம் விருந்து அளிக்கப்படுகிறது. விக்கிரவாண்டி வி.சாலையை சேர்ந்த 100 க்கும் மேற்பட்டோர் 2 பஸ்கள் மூலம் அழைத்து வரப்படுகிறார்கள், அவர்களுக்கு இன்று மதியம் பனையூரில் விஜய் அவரது கையால் விருந்து அளிக்கிறார் என்று கூறப்படுகிறது.

மாநாட்டிற்காக இடம் கொடுத்தவர்கள் சென்னை வருவதற்கு அழைப்பு விடுக்கப்பட்டுள்ள நிலையில், விஜய் நேரில் கலந்துகொண்டு அவர்களுக்கு விருந்தளிக்க இருக்கிறார். மாநாட்டிற்கு நிலம் வழங்கிய நில உரிமையாளர்கள் மற்றும் விவசாயிகள் பனையூர் கட்சி அலுவலகத்திற்கு வந்தனர். விவசாயிகள் கட்சி அலுவலகத்திற்கு வரும் போது, செல்போன்கள், ஸ்மார்ட் வாட்ச் எடுத்து செல்ல அனுமதி இல்லை  என்றும், அவர்கள் வந்த பேருந்திலேயே கைபேசியை வைத்து விட்டு வர சொல்லி கட்சி தலைமை அறிவுறுத்தியுள்ளதாக தகவல் வெளியாகியுள்ளது.