தேமுதிக நிர்வாகி தேர்தல் பணிக் குழுச் செயலாளர் அழகர்சாமியின் மகன் திருமண விழா மதுரையில் நடைபெற்றது. இந்த விழாவில் தேமுதிக பொதுச் செயலாளர் பிரேமலதா விஜயகாந்த், விஜய பிரபாகரன், சுதீஷ், அதிமுக முன்னாள் அமைச்சர்கள் ஆர்.பி.உதயகுமார், வைகை செல்வன் உள்ளிட்டோர் கலந்து கொண்டனர்.

நிகழ்ச்சியில் பேசிய பிரேமலதா விஜயகாந்த், “கேப்டன் கையில் கை குழந்தையாக இருந்து மணமகனாக மாறி இருக்கும் தீபக்கை பார்ப்பதற்கு மகிழ்ச்சி அடைகிறேன். மதுரைக்கு வந்துவிட்டால் தலைவர் குழந்தையாக மாறிவிடுவார். கேப்டன் எம்ஜிஆரின் தொண்டர், ரசிகர், விசுவாசி.

அந்த காலத்தில் எங்க அப்பா, அம்மா இருவரும் இரட்டை இலைக்கு தான் வாக்களிப்பார்கள். எம்.ஜி.ஆர். வேறு, கருப்பு எம்.ஜி.ஆர். வேறு கிடையாது. 2011ஆம் ஆண்டு தேர்தலில் ஆளுங்கட்சியும், எதிர்க்கட்சியும் ஒரே கூட்டணியால் அமைந்தார்கள். சில துரோகிகள் சூழ்ச்சியால் கூட்டணியில் பிளவு ஏற்பட்டது. கூட்டணியை உடைப்பதற்காகவே சில துரோகிகளை உருவாக்கினார்கள்.

எடப்பாடியாரும், நானும் எத்தனை துரோகங்கள் சூழ்ச்சிகள் வந்தாலும் அத்தனையும் வீழ்த்தி 2011 வரலாற்றை 2026 இல் நிகழ்த்துவோம். விருதுநகரில் விஜய பிரபாகர் சூழ்ச்சி செய்யப்பட்டு துரோகிகளால் வீழ்த்தப்பட்டார். அவர் தோற்கவில்லை; தோற்கடிக்கப்பட்டார்.

திருப்பரங்குன்றத்தில் இன்று கந்த சஷ்டி மூன்றாம் நாள். விஜயகாந்த் எவ்வளவு வேலை இருந்தாலும் கந்த சஷ்டி விரதம் நிச்சயமாக கடைபிடிப்பார். 2026 இல் சரித்திரத்தையும், சகாப்த்தத்தையும் பெற்றே தீருவோம். 200 தொகுதி அல்ல 234 தொகுதிகளிலும் வெற்றியை பெறுவோம்” என கூறினார்.

பின்னர் செய்தியாளர்களிடம் பேசிய பிரேமலதா, “விஜய் கடந்து வர வேண்டிய பாதைகள் ஏராளமாக உள்ளது. எங்கள் கட்சியிலேயே தேசியமும், திராவிடமும் உள்ளது. கேப்டன் தமிழை நேசித்தவர். தமிழைத் தவிர வேறு எந்த மொழியிலும் நடிக்காமல் சரித்திரம் படைத்துள்ளார்.

தமிழ் மொழியை காப்போம் பிற மொழியை கற்போம் என்றுதான் கேப்டன் கூறியுள்ளார். தேசியத்தில் தான் திராவிடம் உள்ளது திராவிடத்தில் தான் தமிழகம் உள்ளது. திமுக கொடுத்த வாக்குறுதிகளில் எதை நிறைவேற்றியுள்ளார்கள்? கொடுத்த வாக்குறுதிகளை நிறைவேற்றி, நல்ல பெயர் வாங்கினால் தான் திமுக இருக்க முடியும்” என்றார்.

விஜய் குறித்து நாம் தமிழர் கட்சி ஒருங்கிணைப்பாளர் சீமான் பேசியது குறித்த கேள்விக்கு, “சீமான் திடீரென்று அந்நியனாக மாறுவார், திடீரென்று அம்பியாக மாறுவார். இதற்கெல்லாம் நாம் பதில் சொல்ல தேவையில்லை. ஏன் தம்பி என்று சொன்னார்? ஏன் லாரியில் அடிபட்டு சாவேன் என்று சொன்னார்? என அவரிடம் தான் கேட்க வேண்டும். எப்போதும் ஒரே நிலைப்பாட்டோடு இருக்க வேண்டும். வாய்க்கு வந்ததை எல்லாம் பேசக்கூடாது” என்று தெரிவித்தார்.