தமிழ்நாடு விவசாயிகள் சங்க 27-வது மாநில மாநாடு தஞ்சையில் இன்று நடந்தது. மாநாட்டில் இந்திய கம்யூனிஸ்டு கட்சியின் மாநில பொதுச்செயலாளர் இரா.முத்தரசன் கலந்து கொண்டார்.  முன்னதாக செய்தியாளர்களுக்கு சந்தித்தார். அப்போது பேசிய அவர், 
மத்திய அரசு கொண்டுவந்த வேளாண்மை சட்டங்களை திரும்ப பெற வேண்டும் என்பதை வலியுறுத்தி விவசாயிகள் தொடர்ந்து போராட்டத்தில் ஈடுபட்டனர்.

போராட்டத்தின் எதிரொலியாக அந்த 3 சட்டங்களையும் ஒன்றிய அரசு திரும்ப பெற்றது. அப்போது வேளாண் பொருட்களுக்கு உரிய விலை வழங்க வேண்டும், விவசாயிகள் மீது போடப்பட்ட வழக்குகளை திரும்பப்பெற வேண்டும், விவசாயிகளின் கடனை தள்ளுபடி செய்ய வேண்டும் என விவசாயிகள் ஒன்றிய அரசுக்கு கோரிக்கை வைத்தார்கள். ஆனால், அதனை நிறைவேற்றவில்லை.

புதிய கல்விக் கொள்கையில் தற்போது 3-ம் வகுப்பில் தேர்ச்சி பெற்றால் தான் 4-ம் வகுப்பு செல்ல முடியும். அதேபோல், 5-ம் வகுப்பில் தேர்ச்சி பெற்றால் தான் 8-ம் வகுப்புசெல்ல முடியும் என உள்ளது. இந்த நிலையை அமல்படுத்தினால் 75 சதவீத மாணவர்கள் கல்வியை இடை விட்டு சென்று விடுவார்கள். ஏழை மாணவர்களின் கல்வி இல்லாமல் போய்விடும். இதற்கு தான் மும்மொழி கொள்கையை கொடுக்காமல் புதிய கல்வியை ஏற்காமல் நாங்கள் எதிர்க்கிறோம்.

மத்திய அரசு நடத்தும் நவோதயா பள்ளியில் ஒன்றில் கூட தமிழ் ஆசிரியர்கள் இல்லை. மூன்றாவது மொழியாக எதை வேண்டுமானாலும் படிக்கலாம் என்றால் அவர்கள் கேட்கும் மொழிக்கு எல்லாம் ஆசிரியர் நியமித்து சொல்லிக் கொடுப்பது சாத்தியமில்லை. எனவே, அவர்கள் இந்தியை திணிக்க தான் பார்க்கிறார்கள். எனவே தான் இந்தி திணிப்பை கண்டித்து போராட்டம் நடத்துகிறோம். இந்த போராட்டம் கண்டிப்பாக வெற்றி பெறும்.

மத்திய அரசு இதனை அரசியல் ரீதியாக எதிர்க்க முடியாமல், மாநில அரசுக்கு கொடுக்க வேண்டிய நிதியை குறைத்தால் மாநில அரசுக்கு நெருக்கடி ஏற்படும் என்ற எண்ணத்தில் மாநில அரசுக்கான நிதியை குறைக்கிறார்கள். இதனை தமிழக மக்கள் ஏற்க மாட்டார்கள்.
100 நாள் வேலை திட்டத்திற்கான நிதி பயனாளிகளுக்கு குறைக்கப்பட்டு வருகிறது. மத்திய அரசு 100 நாள் வேலை திட்டத்திற்கான நிதியை கொடுக்காததால் 3 மாதமாக ஊதியம் கொடுக்க முடியாத நிலை ஏற்பட்டுள்ளது. 

மத்திய அரசு கல்வி நிதி, 100 நாள் வேலை திட்டம் நிதி, பேரிடர் நிவாரண நிதி என எதையும் வழங்காமல் தமிழகத்தை புறக்கணிப்பது போராட்டத்தை தூண்டுவதாகும். தேர்தல் ஆணைய தலைவர்களை நியமிப்பதற்குக்கு ஏற்கனவே ஒரு விதி இருக்கிறது. ஆனால், மத்திய அரசு தனது பெரும்பான்மையை பயன்படுத்தி தன்னிச்சையாக தலைவரை முடிவு செய்து நியமனம் செய்கிறது. மத்திய அரசு செயல்படுத்தக்கூடிய இந்த முறை என்பது தேர்தலின் மீதும், தேர்தல்முறை மீதும் உள்ள நம்பிக்கையை கெடுப்பதாகும்.
இவ்வாறு அவர் கூறினார்.