கடந்த 2020 ஆம் ஆண்டு அளிக்கப்பட்ட லுக் அவுட் நோட்டீஸ் காரணமாக இன்று சென்னை திரும்பிய இளைஞர் விமான நிலைய அதிகாரிகளால் பிடிக்கப்பட்டு போலீசரிடம் ஒப்படைக்கப்பட்டுள்ளார். 

சென்னையை சேர்ந்த இளம் பெண் ஒருவர் கடந்த 2012 முதல் 2016 ஆம் ஆண்டு வரை கும்பகோணத்தில் உள்ள தனியார் பொறியியல் கல்லூரியில் படித்த போது,  அங்கு படித்து வந்த கடலூர் மாவட்டம், லால்பேட்டை பகுதியைச் சேர்ந்த முகமது என்ற மாணவருடன் காதல் ஏற்பட்டுள்ளது.  திருமணம் செய்து கொள்வதாக கூறி இளம் பெண்ணை பாலியல் வன்கொடுமை செய்ததாக கூறப்படுகிறது.

கல்லூரி முடிந்து இளம்பெண் சென்னையில் வேலை செய்து வந்த போதும், முகமது என்ற அந்த இளைஞர் சென்னை வந்து இளம் பெண் உடனான தனது காதலை நீட்டித்து திருமணம் செய்து கொள்வதாக கூறி தொடர் பாலியல் வன்கொடுமை செய்து வந்ததாக கூறப்படுகிறது.

இந்த நிலையில் கடந்த 2018 ஆம் ஆண்டு முகமது, தான் துபாய் சென்று வேலை செய்வதாக கூறி துபாய் சென்றுள்ளார். பின், துபாய் சென்றவுடன் அவருக்கு திருமணம் ஏற்பாடுகள் செய்யப்பட்டுள்ளது. இதனையடுத்து இளம் பெண் அவரது தாயாரிடம் கேட்டபோது ரூபாய் 5 லட்சம் பணம் தர வேண்டும். மேலும் முஸ்லிம் மதத்திற்கு மாற வேண்டும் எனக் கூறி இளம் பெண்ணை கட்டாயப்படுத்தி குர் ஆன் படிக்க நோன்பு இருக்க வைத்ததாகவும் கூறப்படுகிறது. 

இதனால், பாதிக்கப்பட்ட இளம் பெண் கடந்த 2020 ஆம் ஆண்டு வடபழனி அனைத்து மகளிர் காவல் நிலையத்தில் புகார் அளித்தார். புகாரின் பேரில் வடபழனி போலீசார் வழக்கு பதிவு செய்து முகமதுவுக்கு எதிராக "லுக் அவுட் நோட்டீஸ்" வழங்கி விசாரணையில் ஈடுபட்டு வந்தனர். குறிப்பாக மதமாற்ற தடைச் சட்டம், நம்பிக்கை மோசடி உள்ளிட்ட பிரிவுகளின் கீழ் வழக்கு பதிவு செய்து விசாரணை மேற்கொண்டு வந்தனர்.

இந்த நிலையில் இன்று அதிகாலை முகமது துபாயில் இருந்து சென்னை விமான நிலையம் வந்தபோது, விமான நிலைய அதிகாரிகளால் "லுக் அவுட் நோட்டீஸ்" காரணமாக பிடித்து வடபழனி அனைத்து மகளிர் போலீசாரிடம் ஒப்படைத்தனர். விமான நிலையம் சென்று முகம்மது (27) என்ற இளைஞரை கைது செய்த வடபழனி போலீசார் அவரிடம் தீவிர விசாரணை மேற்கொண்டு வருகின்றனர்.