மயிலாடுதுறை மாவட்டம் சீர்காழி அருகே உள்ள கிராமத்தைச் சேர்ந்த மூன்றரை வயது சி்றுமி அப்பகுதியில் உள்ள அங்கன்வாடிக்குச் சென்றுள்ளார். அப்போது அங்கு வந்த 16 வயது சிறுவன் ஒருவன், குழந்தைக்கு சாக்லேட் வாங்கி கொடுத்து அழைத்துச் சென்றதாகக் கூறப்படுகிறது. அதன் பின்னர் குழந்தையை அருகில் உள்ள மறைவான இடத்திற்கு அழைத்து சென்று பாலியல் துன்புறுத்திலில் ஈடுபட்டதாக தெரிகிறது.

இதனால் அதிர்ச்சியடைந்த குழந்தை கதறி அழுததும் ஆத்திரமடைந்த சிறுவன் குழந்தையின் தலை மற்றும் முகத்தில் கல்லால் தாக்கியுள்ளார். இதில், சிறுமியின்  கண் பகுதி கடுமையாகப் பாதிக்கப்பட்டுள்ளது. இதையடுத்து, அப்பகுதியில் இருந்து சிறுவன் தப்பிச் சென்றுள்ளார். இதற்கிடையே சிறுமி வெகு நேரமாகியும் வீடு திரும்பாததால்  குழந்தையின் பெற்றோர் தீவிரமாக தேடி உள்ளனர்.

அப்போது அங்கன்வாடிக்கு அருகே ஆள் நடமாட்டம் இல்லாத பகுதியில் இருந்து  குழந்தையின் அழுகை சத்தம் கேட்ட நிலையில் அப்பகுதிக்கு சென்று பார்த்துள்ளனர். அங்கு சிறுமி பலத்த காயங்களுடன் உயிருக்கு ஆபத்தான நிலையில் இருப்பதை கண்டு அதிர்ச்சியடைந்தனர். பின்னர சீர்காழி அரசு மருத்துவமனையில் முதலுதவி சிகிச்சைக்கு அனுமதிக்கப்பட்டார்.

அதனைத் தொடர்ந்து மேல் சிகிச்சைக்காகப் புதுச்சேரியில் உள்ள ஜிப்மர் மருத்துவமனையில் அனுமதிக்கப்பட்டுள்ளார். இச்சம்பவம் குறித்து வழக்குப்பதிவு செய்த போலீஸார் குற்ற சம்பவத்தில் ஈடுபட்ட 16 வயது சிறுவனை கைது செய்தனர். இதனிடையே மூன்றரை வயது சிறுமி பாலியல் வன்கொடுமை செய்யப்பட்ட விவகாரத்தில் குழந்தையை தவறாக நடந்து கொண்டுள்ளதாக மயிலாடுதுறை மாவட்ட ஆட்சியர் பேசியது சர்ச்சையை ஏற்படுத்தியுள்ளது. 

அதாவது, மயிலாடுதுறையில் குழந்தைகள் நலன் மற்றும் சிறப்பு சேவைகள் துறை சார்பில் மாவட்ட குழந்தைகள் பாதுகாப்பு அலகு மூலம் காவல் அலுவலர்களுக்கான போக்சோ சட்டம் குழந்தைகள் பாதுகாப்பு மற்றும் பராமரிப்பு குறித்த ஒருநாள் திறன் வளர்ப்பு பயிற்சி முகாம் நடைபெற்றது. இதில், கலந்து கொண்ட மாவட்ட ஆட்சியர் மகாபாரதி, சீர்காழியில்  அங்கன்வாடிக்கு சென்ற மூன்றரை வயது சிறுமி, 16 வயது சிறார் குற்றவாளியால் பாலியல் வன்கொடுமை செய்யப்பட்ட சம்பவத்தில் குழந்தையே தவறாக நடந்து கொண்டிருக்கிறது. 

எனக்கு கிடைத்த ரிப்போர்ட்டின் படி அந்த குழந்தை சிறுவனின் முகத்தில் உமிழ்ந்துள்ளது. அதுதான் காரணம். எனவே, இரண்டு தரப்பிலும் பார்க்க வேண்டிய கட்டாயத்தில் நாம் இருக்கிறோம்.  இதுபோன்ற விஷங்களை குழந்தைகளுக்கு சொல்லித் தருவது குறித்து பெற்றோர்களுக்கு உணர வைக்க வேண்டும் என சர்ச்சை ஏற்படுத்தும் விதத்தில் பேசினார். இச்சம்பவம் பெரும் பரபரப்பை ஏற்பட்டுத்தியது.

இந்நிலையில், மாவட்ட ஆட்சியரின் சர்ச்சைக்கு பேச்சுக்கு  பாஜக மாநிலத் தலைவர் அண்ணாமலை கண்டனம் தெரிவித்துள்ளார். இதுகுறித்து அவர் வெளியிட்டுள்ள பதிவில், “சீர்காழியில், மூன்றரை வயது குழந்தை பாலியல் வன்முறைக்கு உள்ளாக்கப்பட்ட சம்பவம் குறித்து மயிலாடுதுறை ஆட்சியர்,  அந்தக் குழந்தையின் மீதும் தவறு இருக்கிறது என்று முற்றிலும் பொறுப்பற்ற முறையில் கூறியிருக்கிறார். 

அவருக்கு, பாஜக  சார்பில் வன்மையான கண்டனத்தைத் தெரிவித்துக் கொள்கிறோம். தமிழகம் முழுவதும் தொடர்ந்து பெண்களும், பள்ளி மாணவிகளும், குழந்தைகளும் பாலியல் தாக்குதலுக்கு உள்ளாகி வரும் நிலையில், முதலமைச்சரும், அமைச்சர்களும், பாதிக்கப்பட்டவர்கள் மீதே பழிபோட்டு, அவர்களின் தனிப்பட்ட விவரங்களை வெளியிட்டதன் தொடர்ச்சியே, மாவட்ட ஆட்சியரின் இந்த முட்டாள்தனமான பேச்சுக்குக் காரணம். விளம்பர நாடகங்களை அரங்கேற்றி, தனக்குத்தானே பாராட்டுப் பத்திரம் வாசித்துக் கனவுலகில் சஞ்சரிக்கும் முதலமைச்சர் ஸ்டாலின், எப்போதுதான் இயல்பு நிலைக்கு வருவார்? " என்று குறிப்பிட்டுள்ளார்.

சீர்காழியில், மூன்றரை வயது குழந்தை பாலியல் வன்முறைக்கு உள்ளாக்கப்பட்ட சம்பவம் குறித்து மயிலாடுதுறை ஆட்சியர், அந்தக் குழந்தையின் மீதும் தவறு இருக்கிறது என்று முற்றிலும் பொறுப்பற்ற முறையில் கூறியிருக்கிறார். அவருக்கு, @BJP4Tamilnadu சார்பில் வன்மையான கண்டனத்தைத் தெரிவித்துக்… pic.twitter.com/OxoZTiEyC4

— K.Annamalai (@annamalai_k) February 28, 2025