Kalanchery Village in Thanjavur : தஞ்சாவூர் மாவட்டம் பாபநாசம் தாலுக்கா களஞ்சேரி ஊராட்சிக்கு உட்பட்ட விழுதியூர், குருவாலபபாடி, கருப்பூர் கிராமங்களில் சுமார் ஆயிரத்திற்கு மேற்பட்ட குடும்பங்கள் வசித்து வருகின்றன. இந்த ஊராட்சியில் கடந்த  100 ஆண்டுகளுக்கு மேலாக சாலையில்  தெரு விளக்கு வசதி இல்லாமல் பொதுமக்கள் பயத்துடனே வாழ்ந்து வருகின்றனர்.

உடல்நிலை சரியில்லாமல் போனால் மருத்துவம் பார்ப்பதற்கும், பள்ளி கல்லூரிகளுக்கு செல்வதற்கும் மற்றும் அத்தியாவசிய பொருட்கள் வாங்க செல்வதற்கும், அன்றாட வேலைக்கு செல்பவர்களும் கூட இந்த இருண்ட சாலையை தான் கடந்து செல்ல வேண்டிய சூழல் இருந்து வருகிறது. 

மேலும் இந்த சாலையில் பாம்புகள், அபாயகர விலங்குகளின் நடமாட்டம் இருப்பதாகக் கூறப்படும் நிலையில், இரவு நேரங்களில் செயின் பறிப்பு, பாலியல் வன்கொடுமை போன்ற கொடூரங்களும் நடக்க வாய்ப்பு உள்ளதாகவும் கூறப்படுகிறது. இதனால் இந்த கிராமம் பயத்திலேயே ஒவ்வொரு நாளையும் கடந்துக் கொண்டிருக்கும் நிலையில், பலமுறை அதிகாரிகளிடம் புகார் தெரிவித்தும் எந்த ஒரு நடவடிக்கையும் இதுவரை எடுக்கப்படாமல் இருக்கிறது. மேலும், சோலார் மின் விளக்கை ஏற்படுத்தி தர மறுப்பதாகவும் கிராம மக்கள் குற்றம் சாட்டுகின்றனர்.

தங்கள்  கிராம மக்களின் பாதுகாப்பை கருத்தில் கொண்டு  உடனடியாக போர்கால அடிப்படையில் சோலார் விளக்கு அமைப்பதற்கு தமிழக அரசும், சம்பந்தப்பட்ட துறை அதிகாரிகளும் உடனடி நடவடிக்கை மேற்கொண்டு கிராம மக்களின் 100 வருட கோரிக்கையை நிறைவேற்ற வேண்டும் என்பதே கிராம மக்கள் கோரிக்கையாக இருந்து வருகிறது. இதனை தமிழ்நாடு அரசு உடனடியாக பார்வையிட்டு, உடனடி நடவடிக்கையை எடுக்குமா? என்பதை பொறுத்திருந்துதான் பார்க்க வேண்டும்.