ஒரு ஆண்டு காலமாக இசையமைப்பாளர் தேவாவின் மகள் வீட்டில் வாடகை தராமல் இருந்து வந்ததால் மூன்று மாதங்களுக்கு முன்பு தேவாவின் மகள் காவல் நிலையத்தில் புகார் அளித்திருப்பது விசாரணையில் அம்பலமாகி உள்ளது.

சென்னை வடபழனி ஆற்காடு சாலையில் இசையமைப்பாளர் தேவாவின் மகள் ஜெயபிரதாவுக்கு சொந்தமான அடுக்குமாடி குடியிருப்பு அமைந்துள்ளது. இந்த வீட்டின் கீழ் தளத்தில் கடந்த 3 வருடங்களுக்கு முன்பு தீபிகா மற்றும் ஜெயக்குமார் தம்பதியினருக்கு வாடகை விட்டதாக தெரிகிறது. 

இந்த நிலையில் வாடகைக்கு குடியிருந்த தீபிகா திடீரென கதறிக்கொண்டு வீடியோ ஒன்றை வெளியிட்டுள்ளார். அது சமூக வலைதளங்களில் வைரலாகி பெரும் பரபரப்பை ஏற்படுத்தி உள்ளது. அந்த வீடியோவில் தீபிகா தனது வீட்டில் கத்தியுடன் புகுந்த 7 நபர்கள் தன்னை மிரட்டியதாக தெரிவித்துள்ளார்.

மேலும், விட்டு வீட்டிலிருந்த அனைத்து பொருட்களை அடித்து உடைத்துவிட்டு தப்பி சென்றதாகவும், உயிர் பிழைத்ததே பெரிது எனவும் கதறியபடியே தெரிவித்துள்ளார். எனக்கும் எனது கணவருக்கும் ஏதாவது உயிருக்கு பிரச்சனை ஏற்பட்டால் அதற்கு காரணம் ஜெயபிரதா தான் என தெரிவித்துள்ளார்.

இது சம்பந்தமாக தீபிகா 100-க்கு கால் செய்து தெரிவித்த நிலையில் வடபழனி போலீசார் நேரில் வந்து விசாரணை நடத்தினர். சம்பவம் குறித்து வடபழனி போலீசார் விசாரணை மேற்கொண்டதில், ஜெயப்பிரதாவின் வீட்டிற்கு தீபிகா மூன்று ஆண்டுகளிக்கு முன் வாடகைக்கு வந்ததாகவும், கடந்த ஒரு ஆண்டு காலம் வாடகையை தராமல் தீபிகா இருந்து வந்ததாகவும் தெரியவந்துள்ளது.

இதனையடுத்து, தீபிகா மற்றும் அவரது கணவர் மீது மூன்று மாதங்களுக்கு முன், இசையமைப்பாளர் தேவாவின் மகள் ஜெயப்பிரதா வடபழனி காவல் நிலையத்தில் புகார் அளித்ததும் அப்பொழுது இரு தரப்பையும் அழைத்து போலீசார் விசாரணை செய்ததும் தெரிய வந்தது.

மேலும், முறையாக வாடகை அளிப்பதாக கூறிய ஜெயப்பிரதா மீண்டும் வாடகை அளிக்காமல் இருந்து வந்ததும் தெரிய வந்துள்ளது. ரூபாய் 25 ஆயிரம் வாடகைக்கு குடியேறிய நிலையில் கடந்த ஒரு ஆண்டு காலமாக வாடகை தராமல், தனது ஹார்டுவேர்ஸ் கடை நஷ்டத்தில் இயங்கி வருவதால் தர இயலவில்லை எனவும் தீபிகா, ஜெயப்பிரதாவிடம் போலீசார் முன்னிலையில் அப்போது தெரிவித்ததாகவும் போலீசார் தெரிவித்துள்ளனர்.

எனினும், தற்போது தீபிகா வீடியோ வெளியிட்டு தன்னையும் தன் கணவரையும் அடியாட்கள் வீட்டிற்கு வந்து மிரட்டியதாக கூறிய நிலையில் இது தொடர்பாக வடபழனி காவல் நிலையத்தில் புகார் அளித்துள்ளார். இந்த சம்பவம் குறித்து வடபழனி போலீசார் விசாரணை மேற்கொண்டு வருகின்றனர்.

மேலும் இந்த விவகாரம் தொடர்பாக இசையமைப்பாளர் தேவா மற்றும் அவரது மகள் ஜெயபிரதாவிடம் பேசியபோது, மூன்றாண்டுகளுக்கு முன்பு தீபிகா மட்டும் வாடகைக்கு வீடு வேண்டும் என கேட்டதாகவும், பின்பு அவரது கணவர் வந்ததாகவும், அப்போதிலிருந்தே வாடகை தராமல் ஏமாற்றி வருவதாகவும் தெரிவித்தார்.

தவிர, தாங்கள் இது குறித்து காவல் நிலையம் மற்றும் நீதிமன்றத்தில் வழக்கு தொடர்ந்து இருப்பதாகவும் அவர்கள் தகவல் தெரிவித்தனர். நாங்கள் ஆட்களை ஏவிவிட்டு தாக்க முயன்றது என்று கூறுவது முற்றிலும் பொய் எனவும் அவர்கள் நடிப்பதாக தகவல் தெரிவித்துள்ளனர். நாளை இந்த சம்பவம் தொடர்பாக செய்தியாளர்கள் சந்திப்பு ஏற்பாடு செய்ய உள்ளதாகவும் தெரிவித்தார்.