தூத்துக்குடி மாவட்டம் கோவில்பட்டி காந்திநகர் பகுதியில் வீட்டில் விளையாடிக் கொண்டிருந்த  ஐந்தாம் வகுப்பு மாணவன் நேற்று மாயமான  நிலையில் அவனது வீட்டின் அருகேயுள்ள மொட்டை மாடியில் சடலமாக மீட்கப்பட்டுள்ளார்.

தூத்துக்குடி மாவட்டம் கோவில்பட்டி காந்திநகர் பகுதியில் வசித்து வரும் கார்த்தி சுந்தரி தம்பதியினர் இருவரும் கூலி வேலை செய்து வருகின்றனர் .இவர்களுக்கு இரண்டு மகன்கள் உள்ளன.  மூத்த மகன்  மணிகண்டன் 7 ம்  வகுப்பும் இரண்டாவது மகன் கருப்பசாமி 5 ம்  வகுப்பும் அப்பகுதியில் உள்ள அரசு உயர்நிலைப் பள்ளியில் பயின்று வருகின்றனர்.  கடந்த 10 நாட்களுக்கு மேலாக உடல்நிலை சரியில்லாத காரணத்தினால் கருப்பசாமி வீட்டிலேயே இருந்துள்ளான் .

இந்நிலையில் நேற்று காலை வீட்டில் பெற்றோர் மகனுக்கு உணவளித்துவிட்டு இருவரும் வேலைக்கு சென்ற நிலையில், கருப்பசாமியின் சகோதரன் மணிகண்டன் பள்ளிக்கு சென்றதாக கூறப்படுகிறது. இந்நிலையில் தனியாக இருந்த கருப்பசாமி விளையாடிக் கொண்டிருக்கும்போது திடீரென மாயமாகி விட்டதாகவும், மாயமான சிறுவனின் கழுத்தில் நகை அணிந்து இருந்ததாகவும் கூறப்படுகிறது. 

ஆள் நடமாட்டம் அதிகம் உள்ள பகுதியில் சிறுவன் மாயமானது குறித்து உறவினர்கள் அக்கம் பக்கத்தினர் போலீசார் என தேடி வந்த நிலையில்  மூன்று தனிப்படைகள் அமைக்கப்பட்டு போலீசார் சிறுவனை தேடி வந்தனர். இந்த நிலையில் இன்று காலையில் சிறுவன் வீடு அருகே இருந்த பக்கத்து வீட்டு மாடியில் மூச்சுப் பேச்சில்லாமல் மயக்கம் அடைந்த நிலையில் சிறுவன் கிடந்ததாக கூறப்படுகிறது.  அக்கம் பக்கத்தினர் சிறுவன் மொட்டை மாடியில் இறந்து கிடப்பதாக  போலீசாருக்கும், பெற்றோருக்கும் தகவல் தெரிவித்தனர். இதனையடுத்து சிறுவனின் உடல் மீட்கப்பட்டு கோவில்பட்டி அரசு தலைமை மருத்துவமனைக்கு கொண்டுவரப்பட்டது. தொடர்ந்து பரிசோதனை செய்த மருத்துவர்கள் சிறுவன் இறந்து பல மணி நேரத்திற்கும் மேலானதாக தெரிவித்தனர். இதனால் பெற்றோர்கள் உறவினர்கள் மருத்துவமனையில் சிறுவனின் உடலை கண்டு கதறிய அழுதனர்.

அதே சமயம் அவன் கழுத்தில் இருந்த செயின் மற்றும் மோதிரம் ஆகியவை காணாமல் போனதாக தகவல்கள் வெளியாகியுள்ளதால் நகைக்காக இந்த கொலை நடந்திருக்கலாம் என சந்தேகம் எழுந்த நிலையில்,  மாயமான சிறுவன் நகைக்காக கடத்தப்பட்டாரா அல்லது வேறு ஏதும் காரணமாக என கோவில்பட்டி மேற்கு காவல் நிலைய போலீசார் வழக்கு பதிவு செய்து விசாரணை மேற்கொண்டு வருகின்றனர். மேலும் கோவில்பட்டி டிஎஸ்பி ஜெகநாதன் சம்பவம் தொடர்பாக விசாரணை மேற்கொண்டு வருகிறார் இச்சம்பவம் அப்பகுதியில் பெரும் சோகத்தை ஏற்படுத்தி உள்ளது.

நேற்று காலையில் 9:20 மணிக்கு டிவி ரிமோட் ஒன்றை கருப்பசாமியின் தாயார் பாலசுந்தரி அருகில் உள்ள கேபிள் டிவி ஆபரேட்டிரிடம் வாங்கி கருப்புசாமியிடம் கொடுத்துவிட்டு வேலைக்குச் சென்றாக விசாரணையில் தெரிவித்துள்ளார்.  அது மட்டுமின்றி சடலமாக மீட்கப்பட்ட சிறுவன் கருப்பசாமி காலை 8:30 மணிக்கு அருகில் வசிக்கக்கூடிய தன்னுடைய பாட்டிக்கு போன் செய்து அம்மா வேலைக்கு செல்கிறார். வீட்டிற்கு வாருங்கள் என்று கூறியதாகவும் கூறப்படுகிறது. அவருடைய பாட்டில் 10 மணிக்கு வந்து பார்த்தபோது சிறுவன் காணாமல் போனது தெரியவந்துள்ளது. 

அப்பகுதியில் உள்ள சிசிடிவி காட்சியில் நேற்று காலையில் இருந்து சிறுவன் வெளியே சென்றதற்கான எவ்வித காட்சியும் இல்லை. ஆகையால் சிறுவன் அப்பகுதியில் உள்ள ஏதோ ஒரு வீட்டில் மறைத்து வைத்து அல்லது ஏதோ ஒரு பகுதியில் மறைத்து வைத்து கொலை செய்யப்பட்ட பின்னர் உடலைப் போட்டுச் சென்றுள்ளனரா ?

அதுமட்டுமல்ல சிறுவன் கொலை செய்யப்பட்ட வீட்டின் அருகே உள்ள ஒரு வீட்டில் 24 மணி நேரமும் சட்ட விரோதமாக மது விற்பனை நடைபெற்று வந்ததாக கூறப்படுகிறது. நேற்று காலையில் பதிவான காட்சிகளை போலீசார் ஆய்வு செய்தபோது அந்த நகருக்கு சம்பந்தமில்லாத பலரும் வந்து செல்கின்ற காட்சிகளும் இடம் பெற்றிருக்கிறது. அதையும் போலீசார் ஆய்வு செய்து வருகின்றனர். 

இந்த சூழ்நிலையில் கோவில்பட்டி டி.எஸ்பி. ஜெகநாதன் தலைமையில் போலீசார் விசாரணை நடத்தி வருகின்றனர் ‌

நேற்று போலீசார் வீடு, வீடாக சோதனை நடத்தினர். மேலும் அப்பகுதியில் உள்ள மாடி, குடிநீர் தொட்டிகள் போன்றவற்றிலும் சோதனை செய்தனர்.

அது மட்டுமின்றி இன்று அதிகாலை 4 மணி வரை அப்பகுதியில் போலீசார் தீவிர கண்காணிப்பில் ஈடுபட்டு இருந்தனர். அதன் பின்னர் தான் உடலை வீசி சென்று இருக்கலாம் என்று போலீசார் கூறுகின்றனர்.

சிறுவனின் சடலம் எடுக்கப்பட்ட மாடி வீடு என்பது சிறுவனின் வீட்டிலிருந்து மூன்றாவது வீடு.  அந்த வீட்டின் பகுதியில் உள்ள சந்து வழியாக உடலை எடுத்து வந்து வீசி சென்று இருக்கலாம் என்ற சந்தேகமும் ஏற்படுவதாக போலீசார் தெரிவித்துள்ளனர். 

சிறுவனின் உடலில் எவ்வித காயமும் இல்லை, ஆனால் இறந்து பல மணி நேரம் இருக்கலாம். உடற்கூறு ஆய்விற்கு பின்னர் தான் எப்படி இருந்திருக்கலாம் என்பது தெரியவரும் என்று மருத்துவர்கள் கூறுகின்றனர். 

உண்மையில் நகைக்காக தான் இந்த சம்பவம் நடைபெற்றதா.. அல்லது வேற ஏதும் காரணமா என்ற கோணத்திலும் போலீசார் விசாரணை நடத்துகின்றனர்.