Kurangu Pedal Director on Movie Making Subsidy : புதுச்சேரி அரசு சார்பில் இந்திய திரைப்பட விழா அலையன்ஸ் பிரான்சிஸ் அரங்கில் நடைபெற்றது. 5 நாட்கள் நடைபெறும் இந்த விழாவில் தமிழ், ஆங்கிலம், தெலுங்கு, மலையாளம், இந்தி, வங்க மொழி திரைப்படங்கள் திரையிடபடுகின்றன. நேற்று (அக். 4) நடைபெற்ற தொடக்க விழாவில் முதலமைச்சர் ரங்கசாமி, அமைச்சர் லஷ்மிநாராயணன் ஆகியோர் கலந்து கொண்டு விழாவை தொடங்கி வைத்தனர். தொடர்ந்து 2023ம் ஆண்டின் புதுச்சேரி அரசின் சிறந்த திரைப்படமாக தேர்வு செய்யப்பட்ட ‘குரங்கு பெடல்’ படத்தின் இயக்குநர் கமலக்கண்ணனுக்கு சங்கரதாஸ் சுவாமிகள் விருதும், ரூ. 1 லட்சமும் வழங்கி முதலமைச்சர் ரங்கசாமி கவுரவித்தார். 

இதையடுத்து விழாவில் பேசிய முதலமைச்சர் ரங்கசாமி, “திரைப்படங்கள் மக்களின் வாழ்க்கையில் முக்கியமான ஒன்றாக உள்ளது. ஒரு சில படங்களின் கருத்துகள் மனித வாழ்வுக்கு உகந்ததாக உள்ளதால் அவை சிறந்த படமாக அமைகிறது. திரைப்படங்கள் மூலம் பல்வேறு தலைவர்கள் வந்துள்ளனர். மக்களின் அன்றாட வாழ்க்கையை திரைப்படமாக எடுப்பது மிகக் கடினம். அப்படி ஒரு சில திரைப்படங்கள் மட்டுமே வருகின்றன. அப்படி நல்ல கதையை தேர்வு செய்து அதனை இயக்கி அனைவரது பாராட்டுகளையும் இயக்குநர் கமலக்கண்ணன் பெற்றுள்ளார். அவர் மேலும் மேலும் சிறந்த திரைப்படங்களை இயக்க வேண்டும். அதுமட்டுமின்றி பெயரே தெரியாத படங்கள் மட்டுமே விருதுகள் பெறுகின்றன. ஏனென்றால் அது மக்களின் நலன் சார்ந்த கருத்துக்களை உள்ளடக்கிய படமாக இருக்கும். மேலும் 50 முதல் 100 நாட்கள் வரை ஓடி வெற்றி விழா கொண்டாடும் நிலை மாறி நான்கு நாட்களிலேயே போட்ட பணத்தை வசூல் செய்யும் நிலை மாறி உள்ளது. எனது ஆசிரியரின் சைக்கிளை துடைப்பதாக கூறிவிட்டு அவருக்கே தெரியாமல் அவரை ஏமாற்றி அவரது சைக்கிளில் குரங்கு பெடல் போட்ட அனுபவம் எனக்கு உண்டு. அப்பொழுதெல்லாம் சைக்கிள் வாங்குவதற்கும் அதனை பாதுகாப்பாக பூட்டு போட்டு வைத்திருந்தனர். ஆனால் தற்பொழுது மோட்டார் சைக்கிள் இரண்டு லட்சம் மூன்று லட்சம் என்று கூறுகிறார்கள். அதனை தெருவோரம் நிறுத்திவிட்டு அச்சம் இல்லாமல் இருக்கின்றனர். திருட்டு பயம் இல்லாமல் இருக்கலாம் ஆனால் எனது கார் செல்லும்  தெருக்களில் கூட ஒரு வீட்டிற்கு நான்கு மோட்டார் சைக்கிள் உள்ளது. அதனை ஒழுங்காக கூட நிறுத்தாமல் அசால்டாக இருக்கிறார்கள்” எனத் தெரிவித்துள்ளார்.

இதனை தொடர்ந்து செய்தியாளர்களிடம் பேசிய இயக்குநர் கமலக்கண்ணன், குரங்கு பெடல் படத்திற்கு புதுச்சேரி அரசு விருது வழங்கியுள்ளது மகிழ்ச்சி அளிப்பதாகவும், குழந்தைகளுக்கான படங்களை இயக்கும் இயக்குநர்களுக்கு இந்த விருது ஊக்கமாக இருக்கும் என்றார். மேலும் இந்த திரைப்படத்தை புதுச்சேரி அரசு அனைத்து பள்ளி மற்றும் கல்லூரிகளில் திரையிட வேண்டும் என கேட்டுக்கொண்ட அவர், இந்திய அளவில் பல ஆண்டுகளாக குழந்தை திரைப்படங்கள் குறைந்து வந்தாலும் தமிழில் தற்போது குழந்தைகளுக்கான படங்கள் அதிகரித்து வருவதாகவும், மக்கள் பார்க்க பார்க்க இது போன்ற படங்கள் அதிகமாக வெளியாகும் என்றார். தொடர்ந்து பேசிய அவர், தேசிய விருதில் குழந்தை படங்களுக்கான பிரிவு இல்லை என்பது வருத்தமளிப்பதாகவும், அரசு விருதுகளில் இது போன்ற படங்களை புறக்கணிப்பது இயக்குநர்களை வருத்தமடைய செய்கிறது என்றார். மேலும், இது போன்ற குழந்தைகளுக்கான படங்களை இயக்குவதற்கு மாநில அரசுகள் மானியம் வழங்க முன்வர வேண்டும் எனவும் கேட்டுக்கொண்டார். சமூக அக்கறை, அரசியல் பேசாத திரைப்படங்கள் வெற்றி பெறுவதில்லை என்றும், வரும் காலங்களில் வரலாற்று திரைப்படங்களை இயக்குவதற்கான எண்ணங்கள் இருப்பதாகவும் தெரிவித்தார்.