சென்னையில் கடந்த  நவம்பர் 11, 12 ஆம் தேதிகளில் ஓபிஜி குழும அலுவலகம் மற்றும் அதன் இயக்குநர்களின் வீட்டில் அமலாக்கத்துறையினர் நடத்திய சோதனையில், ரூ.8.38 கோடி பறிமுதல் செய்யப்பட்டுள்ளதாகத் தெரிவிக்கப்பட்டுள்ளது. அந்நிய செலாவணி மேலாண்மை சட்டம் (FEMA) மற்றும் அந்நிய நேரடி முதலீட்டு (FDI) விதிமுறைகளை மீறியது தொடர்பாக சென்னை உள்ளிட்ட இடங்களில் தனியார் மின் உற்பத்தி நிறுவனம் தொடர்புடைய இடங்களில் அமலாக்கத்துறை சோதனை நடத்தப்பட்டது. குறிப்பாக இந்த நிறுவனம் வெளிநாட்டில் நிறுவனத்தின் இருந்து பெறப்பட்ட வெளிநாட்டு நேரடி முதலீட்டின் மூலம் பெற்று கோடிக்கணக்கான ரூபாய்  அளவில், விதிகளை மீறி வெளிநாட்டு பரிவர்த்தனை மேலாண்மை சட்டத்தின் கீழ் நடவடிக்கை எடுக்கும் வகையில் சட்ட விரோத பணப்பரி மாற்றத்தில் ஈடுபட்டதாகவும் குற்றச்சாட்டு தெரிவிக்கப்பட்டுள்ளது. இந்த பணத்தை மியூச்சுவல் ஃபண்ட் மற்றும் ரியல் எஸ்டேட் உள்ளிட்ட விவகாரங்களுக்கு பயன்படுத்தியதாகவும் கூறப்படுகிறது. மேலும் மின் உற்பத்தி விவகாரத்திலும் விதிகளை மீறி பயன்படுத்தப்பட்டதாக கூறப்படுகிறது.

அமலாக்கத்துறை கடந்த 11 மற்றும் 12ஆம் தேதிகளில் சைதாப்பேட்டை சின்னமலை சாலையில் உள்ள OPG Power & Infrastructure Private Limited கார்ப்பரேட் அலுவலகம், ஆர்.ஏ புரத்தில் அமைந்துள்ள இந்நிறுவனத்தின் இயக்குநரான அரவிந்த் குப்தாவின் வீடு, தேனாம்பேட்டையில் பாரதிதாசன் சாலையில் அமைந்துள்ள கௌஷிக் சோலார் கம்பெனி உரிமையாளரான கெளசிக் என்பவரது வீடு, இதைத்தவிர கீழ்பாக்கம் பர்னபி சாலை உள்ளிட்ட 5 க்கும் மேற்பட்ட இடங்களில் அமலக்கத்துறை சோதனையானது  நடத்தப்பட்டது. தமிழ்நாடு மின் உற்பத்தி கழகமானது மின்சார தட்டுப்பாடு காரணமாக தனியார் நிறுவனங்களுடன் கடந்த 2013 ஆம் ஆண்டு மின் வினியோகம் தொடர்பான நீண்ட கால ஒப்பந்தம் போடப்பட்டுள்ளது. நிலக்கரி மின் உற்பத்தி நிறுவனங்கள், சோலார் மின் உற்பத்தி நிறுவனங்கள் உள்ளிட்ட நிறுவனங்களில் இந்த ஒப்பந்தமானது போடப்பட்டுள்ளது. அவற்றில் ஒன்று தான் OPG Power & Infrastructure Private Limited நிறுவனம் ஆகும்.

இதன் மூலம் 414 மெகாவாட் நிலக்கரி மின்சாரம் தமிழ்நாட்டில் நான்கு யூனிட்டுகள் அமைத்து மேற்கொள்ளப்பட்டு வருகிறது. அதில், 74 மெகாவாட்  மின்சாரம் வழங்குவதற்கான ஒப்பந்தமானது தமிழ்நாடு மின் பகிர்மான கழகத்துடன் 15 ஆண்டிற்கு போடப்பட்டுள்ளது. இவற்றில் நிர்ணயித்த அளவைவிட அதிக விலைக்கு தமிழக அரசு மின்சாரம் வாங்கியதாக குற்றச்சாட்டு எழுந்தது குறிப்பிடத்தக்கது. இந்நிலையில் இரண்டு நாட்கள் அமலாக்கத்துறை சோதனை நடத்தி கட்டு கட்டாக பணம் பறிமுதல் செய்துள்ளது. இயக்குனர்களுக்கு சம்மன் அனுப்பி அடுத்த கட்டமாக விசாரணை நடத்த முடிவு செய்துள்ளதாகவும் தெரிவிக்கப்பட்டுள்ளது.