ஒடிசாவில் உள்ள பிடர்கனிகா தேசிய பூங்காவிற்கும் தாம்ரா துறைமுகத்திற்கும் இடையே டானா புயல் கரையை கடந்தது. இருப்பினும் ஒடிசாவில் தொடர்ந்து கனமழை வெளுத்து வருகிறது.

வங்கக் கடலில் உருவான டானா புயல் தீவிர புயலாக வலுப்பெற்றதை அடுத்து மேற்கு வங்கம், ஒடிசாவில் சூறைக்காற்றுடன் கனமழை பெய்து வருவகிறது. இதனால்  காரணமாக ஒடிசாவின் லசோர், பத்ரக், பிதர்கானியா, புரி உள்ளிட்ட பல பகுதிகளில் மரங்கள் வேரோடு சாய்ந்து போக்குவரத்து பாதிக்கப்பட்டதால் மீட்பு படையினர் மரத்தை அகற்றும் பணியில் ஈடுபட்டுள்ளனர். 

மேலும், குடியிருப்பு பகுதிகளை மழைநீர் சூழ்ந்ததால் மக்களின் இயல்பு வாழ்க்கை பாதிக்கப்பட்டுள்ளது. ஒடிசாவின் பிடர்கனிகா தேசிய பூங்காவிற்கும், தாம்ரா துறைமுகம் இடையே புயல் கரையை கடந்து. இதனால் அப்பகுதிகளில் மணிக்கு 100 கிலோ மீட்டர் முதல் 120 கிலோ மீட்டர் வேகம் வரை பலத்த சூறைக்காற்றுடன் கூடிய மழை பெய்து வருவதாக வானிலை மையம் தெரிவித்துள்ளது. ஏற்கனவே 10 லட்சம் பேர் பாதுகாப்பான இடங்களுக்கு வெளியேற்றப்பட்ட நிலையில், மேலும் 3 லட்சம் பேர் இடமாற்றம் செய்யப்பட்டனர். 

அதேபோல், மேற்கு வங்கத்தில் கடற்கரையோரம் வசிக்கும் 5 லட்சம் பேர் வெளியேற்றப்பட்டு பாதுகாப்பான இடங்களில் தங்க வைக்கப்பட்டுள்ளனர். புயல் காரணமாக, ஒடிசாவில் 200க்கும் மேற்பட்ட ரயில்கள் ரத்து செய்யப்பட்டுள்ளது. புவனேஸ்வர் மற்றும் கொல்கத்தா விமான நிலையங்களில் இன்று காலை 9 மணி வரை விமான சேவைகள் நிறுத்தப்பட்டுள்ளது. தேசிய பேரிடர் மீட்பு படையினர் ஒடிசா மற்றும் மேற்கு வங்கத்தில் முகாமிட்டுள்ளனர். மேலும் மாநில பேரிடர் குழுவினர் வேரோடு சாய்ந்த மரங்களை அகற்றும் பணிகளில் முழுவீச்சில் ஈடுபட்டுள்ளனர். மேலும் புயல் காரணமாக ஏற்பட்டுள்ள பாதிப்புகள் குறித்து ஆய்வு செய்ய மாநில அரசுகள் முழு வீச்சில் இறங்கியுள்ளன.