அதானி என்னை வந்து சந்திக்கவும் இல்லை, நான் அவரை பார்க்கவும் இல்லை என்று தெரிவித்துள்ள முதலமைச்சர் மு.க. ஸ்டாலின்,  அதானி மீதான குற்றச்சாட்டுகள் குறித்து நாடாளுமன்ற கூட்டுக்குழு விசாரணை நடத்த பாஜக, பாமக வலியுறுத்துமா..? என சட்டப்பேரவையில்  தெரிவித்துள்ளார். 

அமெரிக்க நீதிமன்றத்தில் அதானி ஊழல் புகார் குறித்த விவகாரத்தில் தமிழக மின்சாரத் துறை பெயரும் அடிபடுகிறது என
உறுப்பினர் ஜி.கே.மணி கேள்வி எழுப்பினார்.

அதற்கு பதில் அளித்த முதலமைச்சர், ஜி.கே.மணி  மட்டுமல்ல, அவரது கட்சி தலைவரும் பொது வெளியில் தொடர்ந்து பேசி வருகின்றனர். அதானிக்கும் முதலமைச்சருக்கு தொடர்புள்ளது, அதானி முதலமைச்சரை சந்தித்து விட்டு சென்றார் என பேசியிருக்கிறார். அதை இங்கு பேசுவார் என எதிர்பார்த்தேன். ஆனால் பேசவில்லை. ஒரு வேலை உண்மை தெரிந்து விட்டது என விட்டுவிட்டார் என கருதுகிறேன்.

தமிழ்நாட்டில் தொழில் முதலீடுகள் குறித்து பொதுவெளியில் வரும் தவறான தகவல்களுக்கு அமைச்சர் செந்தில் பாலாஜி தொடர்ந்து பதில் அளித்து வருகிறார். அதற்கு பிறகும் தொடர்ந்து இந்த செய்திகள் வருகிறது. அதானி நிறுவனத்துடனான முதலீடுகளை வைத்து தமிழக அரசிற்கு கலங்கம் ஏற்படுத்த நினைப்பவர்களிடம் நான் கேள்வி கேட்க விரும்புகிறேன்.

அதானி மீது சொல்லப்பட்டுள்ள குற்றச்சாட்டுகள் குறித்து, பாராளுமன்ற கூட்டுக்குழு விசாரணை அமைக்க வேண்டும். அந்த விவகாரம் குறித்து நாடாளுமன்றத்தில் விவாதிக்க வேண்டும் என இந்திய கூட்டணி கட்சியினர் குரல் எழுப்பி வருகின்றனர். திமுக மீது குற்றம் சொல்லி வரும் பாஜகவோ, பாமகவோ இதை ஆதரிப்பார்களா? இது குறித்து விளக்கி பேச தயாராக இருக்கிறார்களா?

தமிழ்நாட்டிற்கும் இதற்கும் தொடர்பு இல்லை. என்னை வந்து அதானி சந்திக்கவும் இல்லை. நான் அவரை பார்க்கவும் இல்லை. இதை விட விளக்கம் தேவையா? என முதலமைச்சர் மு.க. ஸ்டாலின் சட்டப்பேரவையில் தெரிவித்துள்ளார்.