சென்னை திருவொற்றியூரில் உள்ள தனியார் பள்ளியில் 2வது முறையாக இன்றும் வாயு கசிவு ஏற்பட்டு மாணவர்கள் பாதிக்கப்பட்டதால் பெற்றோர்கள் கடும் வாக்குவாதத்தில் ஈடுபட்டனர்.

சென்னை திருவொற்றியூரில் கிராமத் தெருவில் தனியார் மெட்ரிக்குலேஷன் மேல்நிலைப் பள்ளி செயல்பட்டு வருகிறது இங்கு 6- ம் வகுப்பு முதல் பிளஸ்-2 வரை 1,200க்கும் மேற்பட்ட மாணவ-மாணவிகள் படித்து வருகின்றனர். இந்த நிலையில் பள்ளியின் 3-வது தளத்தில் 6-ம் வகுப்பு முதல் 12-ம் வகுப்பு வரை மாணவிகள் படித்து வருகிறார்கள்.மேலும் அதே தளத்தில் ஆய்வுக்கூடமும் அமைந்துள்ளது.

இந்த நிலையில், கடந்த 25ம் தேதி ரசாயன வாயு கசிவு ஏற்பட்டது. இதனால் வகுப்பறையில் இருந்த மாணவிகளுக்கு வாந்தி, மயக்கம், மூச்சுத்திணறல், கண் எரிச்சல், தொண்டை எரிச்சல் ஏற்பட்டது. சில மாணவிகள் வாந்தி ஏற்பட்டு மயங்கி விழுந்தனர். இதனால் சக மாணவிகள், ஆசிரியர்கள் அதிர்ச்சி அடைந்தனர். வாயுக்கசிவால் மாணவர்கள் பாதிக்கப்பட்டதை அடுத்து அந்த பள்ளிக்கு விடுமுறை அளிக்கப்பட்டிருந்தது.

இந்நிலையில் 10 நாட்களுக்கு பிறகு இன்று பள்ளி மீண்டும் திறக்கப்பட்டது. இதில்  3 மாணவிகளுக்கு வாந்தி, மயக்கம் ஏற்பட்டதால் மீண்டும் பதற்றம் ஏற்பட்டது. மயக்கமடைந்த 3 மாணவிகள் மருத்துவமனையில் அனுமதிக்கப்பட்டுள்ளனர். இதனால் கோபமடைந்த மாணவர்களின் பெற்றோர்கள் பள்ளி முன்பாக கூடி வாக்குவாதத்தில் ஈடுபட்டதால் பரபரப்பு ஏற்பட்டது. இந்த நிலையில், வாயுக் கசிவு ஏற்பட்டதால் அந்த பள்ளிக்கு இன்று (நவ.4)விடுமுறை அறிவிக்கப்பட்டுள்ளது. 2 முறை பள்ளி மாணவிகளுக்கு வாயு கசிவால் பாதிப்பு ஏற்பட்டுள்ளதால் மாவட்ட கல்வித்துறை அதிகாரிகள் மாணவிகளுக்கு ஏற்பட்ட காரணம் குறித்து ஆய்வு செய்ய வேண்டும் என கோரிக்கை எழுந்துள்ளது.