சென்னை அதிமுக வடசென்னை தெற்கு கிழக்கு மாவட்டத்திற்கு உட்பட்ட ராயபுரம் சட்டமன்றத் தொகுதியில் உள்ள ராம் நாயக்கன் தெருவில் மழை வெள்ளத்தால் பாதிக்கப்பட்ட மக்களுக்கு அதிமுக முன்னாள் அமைச்சர் ஜெயகுமார் உணவுகளை வழங்கினார். இதைத்தொடர்ந்து செய்தியாளர்களை சந்தித்த அவர், “வடகிழக்கு பருவமழை கடுமையான தாக்கத்தை தமிழ்நாடு முழுவதும் ஏற்படுத்தும் என்ற அடிப்படையில் நடவடிக்கைகளை அரசு ஏற்படுத்தி தரவில்லை. மழை நீர் வடிகால் பணிகள் குறித்து அமைச்சர்களே மாறி மாறி பேசி வருகிறார்கள். மழைக் காலத்தில் யாராவது மழை நீர் வடிகால்வாய்கள் பணிகளை மேற்கொள்வார்களா? 

ரிப்பன் மாளிகையில் துணை முதல்வர் ஆய்வு மேற்கொண்டபோது செய்தியாளர்களின் கேள்விக்கு சரியாக பதில் சொல்லவில்லை. செய்தியாளர் சரியாகக் கேட்கிறார். திமுக ஆட்சிக்கு வந்து மூன்று ஆண்டுகளாக என்ன செய்தீர்கள் என்ற கேள்விக்கு துணை முதலமைச்சர் ஒரு கத்துக்குட்டி போல பதில் அளிக்கிறார். நீர்வழித்தடத்தில் அடைப்புகள் உள்ளது. அதனை பேரிடர் காலங்களில் எப்படி எதிர்க்கொள்வது என்ற எந்த திட்டங்களையும் அரசு மேற்கொள்ளவில்லை. அவர்கள் செய்த திட்டங்கள் என்னென்ன?

வேளச்சேரி பாலத்தில் மக்கள் பயந்து வாகனத்தை நிறுத்தி உள்ளனர். இது ஆட்சி மீது மக்கள் நம்பிக்கை இல்லாதது என்பதைக் காட்டுகிறது. எதிர்க்கட்சி தலைவரின் கேள்விக்கு பொறுப்பாக பதிலளிக்காமல் விளையாட்டுப் பிள்ளையாக துணை முதல்வர் உதயநிதி ஸ்டாலின் பதில் அளிக்கிறார். அவர் தெளிவாகத்தான் இருக்கிறாரா அல்லது தெளிவில்லாமல் இருக்கிறாரா எனத் தெரியவில்லை. நான் என்ன சொல்கிறேன் என உங்களுக்குப் புரிந்திருக்கும். அரசை பொறுத்தவரை வேலை பார்பது போல காட்டிகொள்கிறார்கள். சேப்பாக்கம் திருவல்லிக்கேணி பகுதியில் இடுப்பளவு தண்ணீர் உள்ளது. முதலமைச்சரின் தொகுதியில் இடுப்பளவு தண்ணீர் இருக்கிறது. வடகிழக்கு பருவமழை கடுமையான தாக்கத்தை தமிழ்நாடு முழுவதும் ஏற்படுத்தும் என்ற அடிப்படையில் நடவடிக்கைகளை அரசு ஏற்படுத்தி தரவில்லை.  முன்னேற்பாடுகளை ஏற்படுத்தவில்லை. வானிலை ஆய்வாளர்கள் கடுமையாக மழை இருக்கும் என எச்சரித்தபோதும் கூட முன்னேற்பாடுகளை செய்யவில்லை. 

சென்னை - பாண்டிச்சேரி இடையே காற்றழுத்த தாழ்வு மண்டலம் வலுப்பெற்று புயலாக மாறும் எனத் தெரிவிக்கப்பட்டிருந்த நிலையில் புயலாக மாறாமல் காற்றழுத்தத் தாழ்வு மண்டலமாகவே சென்று விட்டது. அதனால் மழை குறைந்துவிட்டது. இன்றைக்கு(அக். 16) ரெட் அலர்ட் கொடுத்தார்கள். ஆனால் மழை இல்லை. இன்றைக்கு மழை பெய்திருந்தால் திமுகவின் சாயம் வெளுத்து இருக்கும். தற்போது பெய்த மழையில் நீர் போவதற்கு இடம் இல்லை. கழிவு நீரோடு மழை நீரும் கலந்து உள்ளது. அம்மா உணவங்களை மதியம் 12 மணிக்கே மூடிவிட்டார்கள். அம்மா உணவங்களில் உணவை வாங்கி மாநகராட்சி கவுன்சிலர் புஷ்பா என்பவர் காரில் எடுத்து சென்று அவர்கள் செலவில் மக்களுக்கு சாப்பாடு போடுவது போன்று செயல்படுகிறார். அம்மா உணவங்களில் இலவச உணவு வழங்குவது எல்லாம் எடப்பாடி ஆட்சி காலத்திலே கொண்டுவரப்பட்டது. மழை குறைவாக பெய்ததால் மழை நீர் தேங்கவில்லை என திமுகவினர் கூறி வருகிறார்கள். ஆனாலும் பல இடங்களில் மழை நீரோடு கழிவு நீரும் கலந்துள்ளது. முதலமைச்சரின் தொகுதியான கொளத்தூரில் மக்கள் கஷ்டப்படுகிறார்கள். 

மாநகராட்சி பணிகளுக்காக 5 ஆண்டுகளில் ரூ. 14,000 கோடி அதிமுக ஆட்சி காலத்தில் செலவு செய்துள்ளோம். அப்போது என்னென்ன துறைகளுக்கு எவ்வளவு செலவு செய்துள்ளோம் என எங்களிடம் உள்ளது. ஆனால் திமுகவால் அப்படி வெளிப்படையாக சொல்ல முடியுமா? ஒரு நாட்டிற்கு குடும்பத் தலைவர் முதலமைச்சர்தான். அவர்தான் அனைத்திற்கும் பொறுப்பு. அப்போதுதான் அதிகாராகள் மதிப்பார்கள். எங்கள் ஆட்சிக் காலத்தில் காவலர்கள் ஸ்காட்லாந்து போலீசாக இருந்தனர். ஆனால் இன்று கைகட்டி எப்படி இருக்கின்றனர் என்று உங்களுக்கே தெரியும்” என்றார்.

தொடர்ந்து பேசிய அவரிடம், இந்த மழைக் காலத்தில் அரசின் செயல்பாடுகளை ஆளுநர் பாராட்டியது குறித்து கேள்வி கேட்கப்பட்டது. அதற்கு பதிலளித்த அவர், “ஆளுநரும் அரசும் ஒன்றாகி விட்டனர். ஆளுநர் ஒழிக எனக் கூறிவிட்டு ஆளுநர் வாழ்க எனக் கூறி வருகின்றனர். பிரதமரை பார்த்துவிட்டு வந்த பிறகு பிரதமரை அனுசரித்து போகுமாறு கூறியவுடன் ஆளுநருடன் ஆனுசரித்து செல்கிறது திமுக. அமைச்சர் பொன்முடியை யாரை கேட்டு மாற்றினார்கள்? தற்போதை உயர்கல்வித் துறை அமைச்சர், ஆளுநருடன் மோதல் போக்கு இல்லாமல் செல்ல இருக்கிறோம் என்று கூறியிருக்கிறார். பிரதமரோடு திமுக ஒரு ஒப்பந்தம் போட்டுள்ளது” எனக் குற்றம் சாட்டியுள்ளார்.