டி20 மகளிர் உலகக்கோப்பைத் தொடரில் இன்றைய 11-வது போட்டியில் தென்னாப்பிரிக்க அணியும், ஸ்காட்லாந்து அணியும் பலப்பரீட்சை நடத்தின. இதில் டாஸ் வென்ற தென்னாப்பிரிக்கா அணி முதலில் பேட்டிங் தேர்வு செய்தது. முதலில் களமிறங்கிய தென்னாப்பிரிக்க அணி, வலுவான தொடக்கத்தை பெற்றது. இரண்டு தொடக்க வீராங்கனைகளும் ஸ்காட்லாந்து அணியின் பவுலர்களை திணறடித்து ரன்களைச் சேர்த்தனர். அதன்பிறகு சீரான இடைவெளியில் விக்கெட்டுகளை இழந்தாலும் ரன்களை எடுப்பதில் மட்டும் கோட்டை விடாமல் கவனமாக இருந்தது தென் ஆப்பிரிக்கா அணி. 

முதல் இன்னிங்ஸ் முடிவில் 5 விக்கெட்டுகளை இழந்து 166 ரன்களை தென் ஆப்பிரிக்க அணி குவித்தது. மரிசான் கேப் மற்றும் டாஸ்மின் பிரிட்ஸ் இருவரும் 43 ரன்கள் எடுத்ததோடு, தொடக்க வீராங்கனையான லாரா வோல்வார்ட் 40 ரன்கள் எடுத்திருந்தார்.

அதன் பின் 167 என்ற இமாலய இலக்கை நோக்கி களமிறங்கிய ஸ்காட்லாந்து அணி, தென்னாப்ரிக்க அணியின் வலுவான பவுலிங்கிற்கு தாக்கு பிடிக்க முடியாமல் விக்கெட்டுகளை அடுத்தடுத்து இழந்தது. படுமோசமாக தடுமாறி விளையாடி வந்த ஸ்காட்லாந்து அணி வெறும் 10 ஓவர்களில் 50 ரன்கள் மட்டும் எடுத்து 6 விக்கெட்டுகளை இழந்திருந்தது.

அதனைத் தொடர்ந்து, 17.5 ஓவர்களில் 10 விக்கெட்டுகளை இழந்து 86 ரன்கள் மட்டுமே எடுத்தது ஸ்காட்லாந்து அணி. இதனால், தென்னாப்பிரிக்க அணி 80 ரன்கள் வித்தியாசத்தில் அபார வெற்றியைப் பெற்றது. ஸ்காட்லாந்து அணியைப் பொறுத்தவரை கேத்ரீன் ஃபிரேசர் அதிகப்பட்டமாக 14 ரன்கள் எடுத்திருந்தார். தென்னாபிரிக்க அணியில் நோன்குலுலேகோ மியாபா 3 விக்கெட்டுகளைக் கைப்பற்றி அசத்தினார். 

இந்த வெற்றியின் மூலம் தென்னாப்பிரிக்க அணி இந்த தொடரில் இரண்டாவது வெற்றியைப் பெற்று 4 புள்ளிகளுடன் முதலிடத்தில் இருந்து வருகிறது. அதே போல இந்த தொடரில் தொடர்ந்து 3 தோல்விகளை பெற்று ஸ்காட்லாந்து மகளிர் அணி முதல் அணியாக இந்த தொடரிலிருந்து வெளியேறி உள்ளது.