உலகக்கோப்பை கால்பந்து தொடரின் இரண்டாவது சுற்று ஆட்டங்கள் விறுவிறுப்பாக நடைபெற்று வருகின்றன. இன்று நடைபெற்ற த்ரில்லான போட்டிகளில் குரோஷியாவை வீழ்த்தி போர்ச்சுகலும், ஆஸ்திரியாவை வீழ்த்தி ஸ்பெயினும் அடுத்த சுற்றுக்கு முன்னேறியுள்ளன.
குரோஷியாவை வீழ்த்திய போர்ச்சுகல்
கனடாவின் டொரண்டோ மைதானத்தில் நடைபெற்ற போர்ச்சுகல் - குரோஷியா இடையிலான ஆட்டத்தின் முதல் பாதி கோல் ஏதுமின்றி 0-0 எனச் சமநிலையில் முடிந்தது. தொடர்ந்து நடந்த இரண்டாவது பாதியின் 53-ஆவது நிமிடத்தில் குரோஷியாவின் இவான் பெரிசிச் முதல் கோலை அடித்துத் தன் அணியை முன்னிலைப்படுத்தினார்.
இதையடுத்து ஆட்டத்தை தீவிரப்படுத்திய போர்ச்சுகல் அணிக்கு 68-ஆவது நிமிடத்தில் பெனால்டி வாய்ப்பு கிடைத்தது. அதை நட்சத்திர வீரர் கிறிஸ்டியானோ ரொனால்டோ அநாயசமாகக் கோலாக மாற்றி 1-1 எனச் சமநிலை ஏற்படுத்தினார். 90 நிமிடங்கள் முடிந்தும் இரு அணிகளும் சமநிலையில் இருந்ததால் கூடுதல் நேரம் வழங்கப்பட்டது. அப்போது ஆட்டத்தின் 90+4-ஆவது நிமிடத்தில் போர்ச்சுகல் வீரர் கொண்ட்சாலோ ராமோஸ் அபாரமாக ஒரு கோல் அடித்து அணியை 2-1 என வெற்றி பெறச் செய்தார். இந்தத் தோல்வியால் குரோஷியா தொடரிலிருந்து வெளியேறியது.
ஆஸ்திரியாவை துவம்சம் செய்த ஸ்பெயின்
அமெரிக்காவின் லாஸ் ஏஞ்சல்ஸ் மைதானத்தில் நடைபெற்ற மற்றொரு நாக்-அவுட் போட்டியில் ஸ்பெயின் மற்றும் ஆஸ்திரியா அணிகள் மோதின. ஆட்டத்தின் 36-ஆவது நிமிடத்தில் ஸ்பெயின் வீரர் மிகெல் ஒயார்ஜபால் முதல் கோலை அடித்துத் தன் அணியை முன்னிலை பெறச் செய்தார்.
தொடர்ந்து நடைபெற்ற இரண்டாவது பாதியிலும் ஸ்பெயின் அணியின் ஆதிக்கமே நீடித்தது. போட்டியின் 66-ஆவது நிமிடத்தில் பெட்ரோ பொர்ரோ ஒரு கோலும், ஆட்டத்தின் இறுதிப் பகுதியான 89-ஆவது நிமிடத்தில் மிகெல் ஒயார்ஜபால் தனது இரண்டாவது கோலையும் அடித்து அசத்தினர். ஆட்டநேர முடிவில் ஆஸ்திரியா அணியால் ஒரு கோல் கூட அடிக்க முடியவில்லை. இதனால் 3-0 என்ற கோல் கணக்கில் ஆஸ்திரியாவை வீழ்த்தி ஸ்பெயின் அணி ரவுண்ட் ஆப் 16 சுற்றுக்கு முன்னேறியது.