48 அணிகளின் பங்கேற்புடன் விறுவிறுப்பாக நடைபெற்று வரும் 23-வது உலகக் கோப்பை கால்பந்து தொடரின் 'ஐ' பிரிவு லீக் ஆட்டங்களில் பிரான்ஸ் மற்றும் நார்வே அணிகள் அபார வெற்றி பெற்றுள்ளன.
பிரான்ஸ் அதிரடி
நியூயார்க் நியூ ஜெர்சி மைதானத்தில் நடைபெற்ற 'ஐ' பிரிவின் முதலாவது லீக் ஆட்டத்தில் பலம் வாய்ந்த பிரான்ஸ் மற்றும் செனகல் அணிகள் மோதின. ஆட்டத்தின் தொடக்கம் முதலே பந்தைத் தன் வசம் வைத்திருந்த பிரான்ஸ் அணி, செனகலின் தடுப்பு அரணைத் தகர்த்துத் தீவிரத் தாக்குதல் ஆட்டத்தை வெளிப்படுத்தியது. ஆட்ட நேர முடிவில் பிரான்ஸ் அணி 3-1 என்ற கோல் கணக்கில் செனகலை வீழ்த்தி அபார வெற்றி பெற்றது. பிரான்ஸ் அணியின் நட்சத்திர வீரர் கைலியன் எம்பாப்பே 2 கோல்களையும், பிராட்லி பார்கோலா ஒரு கோலையும் அடித்தனர். செனகல் அணி தரப்பில் இப்ராஹிம் மபாயே ஒரு ஆறுதல் கோல் அடித்தார்.
நார்வே அபார வெற்றி
போஸ்டனில் நடைபெற்ற இதே பிரிவின் மற்றொரு லீக் ஆட்டத்தில் ஈராக் மற்றும் நார்வே அணிகள் பலப்பரீட்சை நடத்தின. போட்டியின் 29-வது நிமிடத்தில் நார்வேயின் நட்சத்திர வீரர் எர்லிங் ஹாலண்ட் முதல் கோல் அடித்து அணியை முன்னிலைப்படுத்தினார். அதற்குப் பதிலடியாக 39-வது நிமிடத்தில் ஈராக்கின் அய்மன் ஹுசைன் ஒரு கோல் அடித்து ஆட்டத்தை 1-1 என சமநிலைக்குக் கொண்டு வந்தார். எனினும், அடுத்த சில நிமிடங்களிலேயே (43-வது நிமிடம்) ஹாலண்ட் தனது இரண்டாவது கோலை பதிவு செய்ய, முதல் பாதியில் நார்வே 2-1 என முன்னிலை பெற்றது.
இரண்டாவது பாதியில் ஆதிக்கம் செலுத்திய நார்வே அணியின் லியோ ஆஸ்டிகார்ட் 76-வது நிமிடத்தில் ஒரு கோல் அடித்து முன்னிலையை 3-1 ஆக உயர்த்தினார். ஆட்டத்தின் இறுதி நிமிடங்களில் ஈராக் வீரர் அய்மன் ஹுசைன் துரதிருஷ்டவசமாகத் தனது சொந்த அணிக்கு எதிராகவே (ஓன் கோல்) கோல் அடித்ததால், நார்வேயின் வெற்றி எளிதானது. இறுதியில் 4-1 என்ற கோல் கணக்கில் ஈராக்கை வீழ்த்திய நார்வே அணி, 3 புள்ளிகளுடன் 'ஐ' பிரிவில் முதலிடத்திற்கு முன்னேறியுள்ளது.