தமிழ் மற்றும் இந்தித் திரையுலகில் பிரபலமான நடிகையாக வலம் வந்தவர் அசின் தொட்டும்கல். அமீர்கானுடன் நடித்த கஜினி திரைப்படம் மூலம் இந்தித் திரையுலகிலும் தனக்கென ஓர் இடத்தைப் பிடித்தார். இதற்கிடையில், மைக்ரோமேக்ஸ் நிறுவனத்தின் இணை நிறுவனரான ராகுல் சர்மாவை 2016-ம் ஆண்டு திருமணம் செய்துகொண்ட அசின், அதன் பிறகு திரையுலகிலிருந்து விலகிக் குடும்ப வாழ்க்கையில் கவனம் செலுத்தி வருகிறார்.
இந்தத் தம்பதிக்கு அரின் ரெய்ன் சர்மா என்ற 8 வயது மகள் உள்ளார். இந்நிலையில், தங்களது மகளை வளர்க்கும் விதம் குறித்து ராகுல் சர்மா பகிர்ந்துள்ள தகவல்கள் தற்போது கவனம் பெற்றுள்ளன.
2025-ம் ஆண்டு MyGov India தளத்துக்கு அளித்த நேர்காணலில் பேசிய ராகுல் சர்மா, தங்களது வீட்டில் தொலைக்காட்சி இல்லை என்றும், மகளுக்கு இதுவரை மொபைல் போன் உள்ளிட்ட எந்தத் திரை சாதனங்களையும் பயன்படுத்த அனுமதிக்கவில்லை என்றும் தெரிவித்துள்ளார். சிறு வயதிலிருந்தே குழந்தைகளுக்கு வாசிப்புப் பழக்கத்தை உருவாக்குவதில் அசின் அதிக அக்கறை காட்டுவதாகவும் அவர் குறிப்பிட்டுள்ளார்.
புத்தகங்களே முக்கியம்!
இதுகுறித்து ராகுல் சர்மா கூறுகையில், “இதுவரை அரினுக்கு எந்தத் திரை சாதனங்களையும் நாங்கள் கொடுக்கவில்லை. எங்கள் வீட்டில் தொலைக்காட்சியோ மொபைல் போன்களோ இல்லை. புத்தகங்கள்தான் அதிகம் இருக்கின்றன. அரின் படிக்கும் பள்ளியில் இருப்பதை விட எங்கள் வீட்டில் அதிகமான புத்தகங்கள் இருக்கலாம்” என்று தெரிவித்துள்ளார்.
தற்போது இரண்டாம் வகுப்புப் படிக்கும் அரினுக்காக, எட்டாம் மற்றும் ஒன்பதாம் வகுப்புகளுக்கான புத்தகங்களையும் ஏற்கெனவே வாங்கி வைத்துள்ளதாக அவர் கூறியுள்ளார். இதனை நகைச்சுவையாகக் குறிப்பிட்ட ராகுல், “அவள் இப்போது இரண்டாம் வகுப்புப் படிக்கிறாள். ஆனால், எங்கள் வீட்டில் எட்டாம், ஒன்பதாம் வகுப்புகளுக்கான புத்தகங்கள் இருக்கின்றன. அவளைப் பத்தாம் வகுப்புப் பொதுத்தேர்வையும் எழுதச் சொல்லலாமே என்று அவ்வப்போது கேலி செய்வேன். இதற்கெல்லாம் அசினின் பங்களிப்புதான் காரணம்” என்று தெரிவித்துள்ளார்.
12 மொழிகள் தெரிந்த 8 வயது சிறுமி!
தங்களது மகளுக்கு மொழிகள் மீது அதிக ஆர்வம் இருப்பதாகவும், கொரியன், ஜப்பானிய, தாய், சீன மொழிகள் உள்ளிட்ட சுமார் 12 மொழிகளைப் புரிந்துகொள்ளவும் பேசவும் தெரியும் என்றும் ராகுல் தெரிவித்துள்ளார். இதைக் குறிப்பிட்ட அவர், “என்னால் இரண்டு மொழிகளைக்கூடச் சரியாகப் பேச முடியவில்லை. ஆங்கிலம், இந்தி என்ற இரண்டு மொழிகளிலேயே நாங்கள் இருக்கிறோம்” என்று நகைச்சுவையாகக் கூறியுள்ளார். இருப்பினும், அரின் இந்த மொழிகளைக் கற்றுக்கொண்ட விதம் மற்றும் அவற்றில் அவருக்கு இருக்கும் புலமை குறித்து அவர் விரிவாக விளக்கவில்லை.
அசின்தான் என் வாழ்க்கையின் மிகப்பெரிய பலம்!
மகளை வளர்ப்பதில் மட்டுமல்லாமல், தனது வாழ்க்கையிலும் அசின் மிகப்பெரிய ஆதரவாக இருப்பதாக ராகுல் பாராட்டியுள்ளார். “அசினைத் திருமணம் செய்துகொண்டதுதான் என் வாழ்க்கையில் மிக முக்கியமான விஷயம். எனக்குப் பின்னால் இருக்கும் மிகப்பெரிய பலம் அவர்தான். எந்தப் பிரச்சினை வந்தாலும், ‘கவலைப்படாதீர்கள், தொடர்ந்து முன்னேறுங்கள்’ என்று ஊக்கமளிப்பார். என்னையும், எனது ஆர்வத்தையும் அவர் நன்றாகப் புரிந்துகொள்கிறார்” என்று தெரிவித்துள்ளார்.
மேலும், வாழ்க்கைத் துணை என்பவர் நம்மை முன்னேற்றுபவராக இருக்க வேண்டுமே தவிர, பின்னால் இழுப்பவராக இருக்கக் கூடாது என்றும் அவர் குறிப்பிட்டுள்ளார். வீட்டுக்கு வெளியே தான் எதிர்கொள்ளும் சவால்களுக்கு மத்தியில், குடும்பத்துக்குள் இருக்கும் பொறுப்புகளையும் சவால்களையும் அசின் கவனித்துக்கொள்வதாகவும் தெரிவித்துள்ளார்.
திரையுலகில் வெற்றிகரமான பயணத்தை மேற்கொண்ட அசின், திருமணத்துக்குப் பிறகு நடிப்பிலிருந்து விலகி குடும்ப வாழ்க்கையில் கவனம் செலுத்தி வருகிறார். இந்நிலையில், மகளுக்கு மொபைல் போன் பயன்பாட்டைத் தவிர்த்து, புத்தக வாசிப்பு மற்றும் மொழிகளைக் கற்றுக்கொள்வதில் முக்கியத்துவம் அளிக்கும் அசின் - ராகுல் சர்மா தம்பதியின் அணுகுமுறை பலரது கவனத்தையும் ஈர்த்துள்ளது.